Мажбурий ижро бюросининг Бағдод туман бўлими томонидан «Тоза-ҳудуд» корхонаси Бағдод филиалида Президентнинг 2018 йилнинг 22 ноябридаги «Қаттиқ маиший чиқиндиларни тўплаш ва олиб чиқиш учун тўловларни тўлаш тизимини тубдан такомиллаштириш чора-тадбирлари тўғрисида»ги Фармони ижроси юзасидан текшириш ўтказилди. Бу ҳақда МИБ матбуот хизмати «Дарё»га хабар берди.
Аниқланишича, Бағдод «Тоза ҳудуд» ташкилоти ҳайдовчиси А.К. аҳолига кўрсатилган хизматлар учун истеъмолчилардан пул тушумларини ундириш ваколати бўлмагани ҳолда, 2019 йил июль—октябрь ойлари давомида жами 101 нафар фуқароларнинг ишончига кириб, уларни алдаб, пулларни корхона ғазнасига кирим қилишини айтиб, маиший чиқиндиларни тўплаш ва олиб чиқиш хизматлари учун мўлжалланган тўлов квитанцияларига сохта ёзувлар киритиш йўли билан жами 5 миллион 720 минг сўм пулни йиғиб олган.
Бу ҳам етмагандай аҳолидан олган пул маблағларини «Тоза ҳудуд» ташкилоти Clean city базасига кирим қилмасдан, ўзининг шахсий манфаатлари йўлида сарфлаб юборган.
Мазкур ҳолат юзасидан А.К.га нисбатан МИБ Бағдод тумани бўлими томонидан 2019 йилга 21 ноябрда Жиноят кодексининг 168-моддаси (фирибгарлик) 1-қисми билан жиноят иши кўзғатилиб, ҳозирда Бағдод туман прокуратураси томонидан дастлабки тергов олиб борилмоқда.
Изоҳ (0)