Ўзбекистонда ҳаво ҳафта давомида қуёшли ва совуқ бўлади. 26 ноябрь, сешанба кунидан бошлаб ҳаво ҳарорати айниқса кечаси кескин совиши, -8 даражагача, айрим жойларда ҳатто -12 даражагача совиши кутилмоқда. Шу муносабат билан Йўл ҳаракати хавфсизлиги бош бошқармасининг ҳайдовчиларга мурожаати билан танишиш фойдадан холи эмас. Сирпанчиқ йўлларда эҳтиёт бўлинг!
Жиззахда 15 ёшли (9-синфда) ўқувчи қиз она бўлгани ҳақида хабар берилган эди. Энди у ўқийдиган мактаб маъмурияти ишониш қийин бўлган гапларни айтяпти: тиббий кўриклар вақтида ҳаммаси жойида бўлганмиш, ўқитувчилар унинг ҳомиладорлигини билдирадиган бирорта белгини сезишмаганмиш (қандай қилиб сезмаслик мумкин экан-а, тавба?). Мактаб директори ўринбосарининг айтишича (унинг гапларига ишонмаслик учун эса сабаб йўқ), қиз намунали ўқувчилардан бири бўлган. «Бу ҳолат зўравонлик оқибати, деб ўйлайман», — дебди у.
Ўзбекистонда Chevrolet Equinox’нинг дастлабки суратлари пайдо бўлди. Айтишларича, янги модел Ўзбекистонда 2020 йил иккинчи чораги — апрель—июнь ойларида сотувга чиқарилиши кутилмоқда. Унинг нархи Chevrolet Trailblazer’никидан (тахминан 38 минг доллар) пастроқ, бироқ Chevrolet Malibu’никидан (тахминан 29—34 минг доллар)дан сал юқорироқ бўлиши кутилмоқда. Ўзи, умуман олганда, шу Malibu’нинг сал каттароқ, баландроқ ва универсал версияси, дейишяпти. UzAuto Motors янги арзон автомобилларни қачон чиқариши ҳақида ҳозирча хат-хабар йўқ.
Ишкаллар. Тошкентда милиция ва Миллий гвардия ходимлари бир қизни базўр, деярли судраб олиб кетаётгани акс этган видео тарқалган эди — видеодаги қиз бунгача фоҳишалик билан шуғуллангани ва милиция ходимларининг қонуний талабларига бўйсунмагани учун 18 марта (!) жавобгарликка тортилган экан. Россияда тарқалган иккита видео ҳам эътибор марказида: бирида боксчи Ҳасанбой Дўсматов чечен полицияси бошлиқларидан бирини бир уриб, нокаут қилгани тахмин қилинганди, лекин видеодаги муштумзўр Ҳасанбой эмас экан; иккинчи видео эса, афсуски, ўзбеклар ва қирғизлар муштлашуви ҳақида. Қани энди шундай воқеалар умуман бўлмаса!..
Фожиалар. Бухорода юз берган ЙТҲ оқибатида эр-хотин вафот этди, Россиянинг Оренбургида содир бўлган авария эса тўрт ўзбекистонликни ҳаётдан олиб кетди. Россияга ишлаш учун келганига энди беш кун бўлган яна бир ўзбекистонлик ис газидан бўғилиб ўлган бўлса, Андижон ва Тошкент вилоятларида бир кунда олти киши ис газидан заҳарланди (не бахтки, уларнинг ҳаётини сақлаб қолишга муваффақ бўлинган). Самарқандда эса бир тадбиркор шериклари билан бирга бошқа бир тадбиркорни ўлдириб қўйди.
Президент оиласининг ижтимоий тармоқлардаги энг фаол вакили — Шавкат Мирзиёевнинг кенжа куёви Отабек Умаров бугун жамоатчилик учун яна бир маълумотни улашди: божаси Ойбек Турсунов 24 ноябрь куни таваллуд кунини нишонлади (тўнғич куёв неча ёшга тўлгани маълум эмас). Аввалроқ, 4 ноябрь куни Отабек Умаров божасининг рафиқаси Саида Мирзиёевани, 8 август куни ўз рафиқаси Шаҳноза Мирзиёевани, 1 августда ўз онасини таваллуд кунлари билан қутлаган эди. 28 октябрда эса оила қурганликларига 12 йил тўлгани муносабати билан Отабек Умаров ва Шаҳноза Мирзиёева бир-бирларини табриклашган эди (айтмоқчи, Отабек Умаров 17 сентябрда тўнғич қизи Маърифатхонни 11 ёшга тўлгани билан, 29 октябрда эса кенжа қизи Ранияни ҳам туғилган куни билан табриклаган).
Ўзбекистонда яна нима янгиликлар? Долларнинг сўмга нисбатан расмий курси пасайди. 2019 йилнинг тўққиз ойида салкам 14 минг ўзбекистонлик Россия фуқаролигини олди. Сенат Самарқанд шаҳри ва тумани чегараси ўзгартиришга доир ҳужжатни қабул қилади. Юнусободдан депутатликка номзод Сергели туманининг номини ўзгартиришни таклиф қилди. Андижон вилоятига янги бош имом-хатиб тайинланди. Ўзбекистон Осиёдаги энг бой тарихий меросга эга мамлакат деб тан олинди, афтидан, шу боис шекилли, Race Across the World реалити-шоусининг навбатдаги эпизодлари айнан Ўзбекистонда тасвирга олинмоқда. Ва яна бир қизиқ хабар — «Пахтакор» стадиони бузилади ва унинг ўрнида янгиси қурилади. Бузилмаган яна нима қолди ўзи Тошкентда?
Жаҳонда-чи? Шифокорлар Ассанж турмада ўлиши мумкинлигидан хавотирда. АҚШ сенатори арманлар оммавий қирғини ҳақидаги резолюция блокланганини маълум қилди. Гонконгда туман кенгашларига сайловларда мухолифат қарийб 90 фоиз овоз олди. Конгода самолёт қулаши оқибатида салкам 30 киши ҳалок бўлди. Эрон ҳукумати норозилик намойишларидаги фитначилар орасида ИШИД аъзолари борлигини маълум қилди.
Изоҳ (0)