Boliviya TIV Moralesning harakatlari sabab Meksikaga e’tiroz bildirdi

Boliviya tashqi ishlar vazirligi Meksika hukumatiga sobiq prezident Evo Moralesni hali ham faoliyat olib borayotgani va siyosiy qochoqqa aylanmagani haqida ma’lumot berilgani yuzasidan e’tiroz bildirdi. Bu haqda “RIA Novosti” xabar berdi.

Boliviya hukumati Meksikani BMT 1967-yilda qabul qilgan deklaratsiyaning 4-moddasini buzganlikda ayblamoqda. Ushbu moddada davlat tomonidan taqdim qilingan hududiy boshpana qochoqlarning faoliyat olib borishini taqiqlaydi, bu BMTning tinchlikni qo‘llab-quvvatlash, do‘stona munosabatlar va boshqa davlatlar ichki siyosatiga aralashmaslik bo‘yicha maqsadlariga zid keladi.

“Evo Morales Meksikadan turib konstitutsiyaviy hukumat, tinchlik va Boliviya fuqarolarining huquqlarini poymol qilmoqda hamda zo‘ravonlik siyosatini targ‘ib qilmoqda”, — deyiladi tashqi ishlar vazirligining Twitter’dagi sahifasida.

20-noyabrda Boliviya ichki ishlar vaziri Arturo Murilyo sobiq prezident Evo Moralesning siyosiy boshpanadan turib koki yetishtiruvchilarga murojaat yo‘llab ularni norozilik namoyishlari o‘tkazishga chaqirgani videosi e’lon qilgan. Muvaqqat hukumat vakillarining so‘zlariga ko‘ra, ushbu harakat oqibatida yo‘llar yopib qo‘yilmoqda va shaharda oziq-ovqat mahsulotlari tanqisligi kuzatilmoqda. Moralesning o‘zi ushbu videoyozuv montaj ekani va Boliviya hukumati bu yo‘l bilan unga qarshi xalqaro ish ochmoqchi ekanligini ma’lum qildi.

Evo Morales 20-oktabrda kichik ustunlik bilan Boliviya prezidentligi uchun o‘tgan saylovlarda g‘olib chiqqan, ammo muxolifat saylovlarda ko‘plab qoidabuzilishlar kuzatilganligini bildirgan. Morales avvaliga saylovlarning qayta o‘tkazilishini aytdi, biroq keyin harbiylar bosimi ostida iste’foga chiqib, mamlakatni tark etdi. Prezidentdan keyin davlatning barcha yuqori lavozimdagi mansabdorlari iste’foga chiqdi, hukumat muxolifat vakili bo‘lgan senat vitse-spikeri Janun Anyes boshqaruviga o‘tdi. Morales tarafdorlari Anyesning prezident vazifasini bajarishi noqonuniy ekanligini aytib, ushbu siyosiy o‘zgarishlarga qarshi kurashmoqda.