Suriya hukumati dunyo jamoatchiligi e’tiborini Anqaraning mamlakat shimoli-sharqidagi tajovuzkor harakatlarni davom ettirayotgani va Ostona hamda Sochi kelishuvlariga amal qilmayotganiga qaratdi. Bu haqda “TASS” xabar berdi.
“Suriya arab respublikasi hujum uyushtirayotgan Turkiya harbiylarining jinoiy harakatlarini, mamlakat xalqiga nisbatan zulm o‘tkazayotganini qoralaydi va jahon hamjamiyatini Anqaraning ushbu zo‘ravonligini to‘xtatishga chaqiradi”, — deyiladi Suriya TIV bayonotida.
Suriya TIV bayonotiga ko‘ra, Turkiya Ostona hamda Sochida imzolangan kelishuvlarga rioya qilmagan holda harbiy jinoyatlarni amalga oshirishda davom etmoqda. Ushbu harakatlar xalqaro qonunchilik va inson huquqlariga amal qilinmayotganini anglatadi.
Mavzuga doir:
9-oktabrda Anqara Suriya shimoli-sharqida Turkiyadagi qochoqlar uchun xavfsiz zona tashkil etish maqsadida “Suriya demokratik kuchlari” kurd jangarilari va IShID terrorchilariga qarshi “Tinchlik bulog‘i” harbiy operatsiyasini boshlagan. Dunyo davlatlari turklarning ushbu harakatlarini qoralagan. AQSh Turkiyaga qarshi sanksiyalar qo‘lladi.
17-oktabrda Anqara va Vashington Suriya shimoli-sharqidagi operatsiyani kurdlar xavfsiz zona hududidan chiqib ketishi uchun 120 soatga to‘xtatishni kelishib oldi va sanksiyalar bekor qilindi.
22-oktabrda Sochida Rossiya prezidenti Vladimir Putin va Turkiya davlat rahbari Rajab Toyyib Erdo‘g‘on Suriya hududidagi notinch vaziyatni muhokama qildi va “Tinchlik bulog‘i” operatsiyasini 23-oktabrdan yana 150 soatga to‘xtatish va o‘t ochmaslik haqidagi shartlashuv muddati yakuniga yetgach hamkorlikda Turkiya—Suriya chegarasida 30 kilometrlik hududni barpo etish uchun qo‘shma patrul tadbirlari o‘tkazish haqida memorandum imzoladi.
1-noyabrda kurdlarning Turkiya chegarasidan 30 kilometr uzoqlikka chekingani va ular tark etgan hududni Sochida imzolangan memorandumga muvofiq Suriya qo‘shinlari va Rossiya harbiy politsiyasi egallashi ma’lum bo‘ldi. 5-noyabrda Turkiya hamda Rossiya harbiylari Suriya shimolidagi Ayn-al-Arab aholi punktidagi (Kobani) ikkinchi qo‘shma patrul tadbirlarini boshladi. 10-noyabrda Turkiya prezidenti Rajab Toyyib Erdo‘g‘on hamda Rossiya prezidenti Vladimir Putin telefon orqali suhbat qilib, Suriyadagi nizolarni hal etish borasida o‘zaro fikr almashgan. Rossiya Turkiya kelishuviga muvofiq ikki davlat harbiylari Suriya shimoli-sharqida jami 8 ta qo‘shma patrul tadbirlari o‘tkazgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)