O‘zbekiston Energetika vazirligi huzuridagi Atom energetikasini rivojlantirish agentligi — “O‘zatom”ning logotipi tasdiqlandi. Bu haqda agentlik tomonidan ma’lum qilindi.
Xabar berilishicha, O‘zbekiston Respublikasining “Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi qonuniga muvofiq Energetika vazirligi huzuridagi Atom energetikasini rivojlantirish agentligining logotipi Adliya vazirligi huzuridagi Intellektual mulk agentligi tomonidan tasdiqlangan.
Logotipda katta harflar bilan UZATOM so‘zi aks ettirilgan. Shuningdek, logotipdan ilm-fan va texnologik taraqqiyotning ramzi sifatida — atom tasviri o‘rin olgan.
Ma’lumot uchun, agentlik Prezidentning “O‘zbekiston Respublikasida atom energetikasini rivojlantirish chora-tadbirlari to‘g‘risida” 2018-yil 19-iyuldagi farmoni va “O‘zbekiston Respublikasi Vazirlar Mahkamasi huzuridagi Atom energetikasini rivojlantirish agentligi faoliyatini tashkil etish to‘g‘risida” qaroriga muvofiq tashkil etilgan.
Izoh (0)