“Daryo” tomonidan Qashqadaryo viloyati Dehqonobod tumani Yashnobod mahallasida joylashgan 40-maktabning 62 nafar o‘quvchi ta’lim oladigan binosida 43 yildan beri elektr energiyasi o‘tkazilmagani haqida xabar berilgan edi.
Ushbu maqoladan so‘ng “Hududiy elektr tarmoqlari” AJ tomonidan mazkur binoga elektr toki o‘tkazildi. Bu haqda aksiyadorlik jamiyati matbuot xizmati tomonidan “Daryo”ga ma’lum qilindi.
O‘rganish natijasida haqiqatan ham 40-sonli maktabning 62 nafar o‘quvchisi tahsil oluvchi filialida elektr energiyasi yo‘qligi, maktab ko‘p yillardan beri shu ahvolda faoliyat yuritganligi ma’lum bo‘lgan.
Vazirlar Mahkamasining 2018-yil 12-yanvardagi “Elektr energiyasi va tabiiy gazdan foydalanish tartibini takomillashtirishga doir qo‘shimcha chora-tadbirlar to‘g‘risida”gi qarorida iste’molchilarning yuklamalarini ulash bilan bog‘liq yangi elektr qurilmalarini va elektr tarmog‘i xo‘jaligining obyektlarini loyihalash va qurish, ishlab turganlarini kengaytirish va rekonstruksiya qilish iste’molchilarning mablag‘lari hisobidan amalga oshirilishi belgilangan. “Shunday ekan, yuqorida qayd etilgan ilm dargohi ham bundan mustasno emas”, — deyiladi kompaniya xabarida.
Qayd etilishicha, Dehqonobod tumani hokimligi, qolaversa Yashnobod mahallasi faollari “Obod qishloq” hamda “Obod mahalla” davlat dasturlari ishlab chiqilishida o‘z vaqtida bu muammo borasida takliflarini bermagan.
Dehqonobod tumanida 2019-yilda O‘zbekiston Prezidentining 2661-sonli qarori hamda “Obod qishloq” va boshqa dasturlar ijrosi bo‘yicha 173 dona temir beton ustuni, 43,5 kilometr elektr uzatish tarmoqlari va 14 dona transformator punkti rekonstruksiya va modernizatsiya qilingan.
“Ta’kidlash joizki, jamiyatning bu boradagi tezkorlik bilan amalga oshirgan sa’y-harakatlari tufayli ushbu masala ijobiy yechimini topdi. Tez kunlarda 43 yil elektr energiyasiz faoliyat yuritgan maktab o‘quvchilari yorug‘ sinflarda ta’limni davom ettiradi.
Ammo haqli savol tug‘iladi.
Nima uchun mahalliy hokimlik vakillari yoki xalq ta’limi boshqarmasi qariyb yarim asr elektr energiyasiz faoliyat yuritgan maktabdagi bu vaziyatga e’tibor qaratmadi?
Yoxud aynan kecha bu holat bilan juda “yaqindan” tanishgan Zoir Aliqulov oldinroq bu masalaga mutasaddi tashkilotlar e’tiborini qaratishga vaqt topolmadi?
Bugungi kunda Dehqonobod tumani iste’molchilarining elektr energiyasidan debitorlik qarzlari me’yoridan ancha oshganligidan hokimning xabari bormikan?”, — deyiladi xabarda.
Izoh (0)