15 milliard so‘mlik mulklaridan ayrilgan va “Daryo” tahririyatiga murojaat qilgan samarqandlik tadbirkor Jamshid Shomurodov ishi bo‘yicha viloyat prokuraturasi rasmiy bayonot berdi.
Bayonotda keltirilishicha, J.Shomurodov “Garant quruvchi servis” MChJ tomonidan kompensatsiya masalasi hal etilmay, uning roziligisiz Samarqand shahar, Gagarin ko‘chasi, 128-uy manzilidagi ko‘p qavatli turar joy binosi buzib tashlaganligidan noroziligi haqida murojaat qilgan.
Samarqand shahar hokimining 27.11.2016-yilgi 1602Q-sonli “Ko‘p qavatli turar joy binosini qurishga ruxsat berish to‘g‘risida”gi qarori bilan MChJga Samarqand shahar, Gagarin ko‘chasi, 128-manzilda joylashgan, besh qavatli turar joy binosi mulkdorlarini ko‘chirish evaziga zamonaviy arxitektura loyihalari asosida ko‘p qavatli turar joy binosini qurishga ruxsat berilgan.
J.Shomurodov tomonidan 12.05.2017-yilda fuqarolik ishlari bo‘yicha Samarqand shahar sudiga 27.11.2016-yilgi shahar hokimining 1602Q-sonli qarorini haqiqiy emas deb topish haqida qilgan da’vo arizasi sudning 27.06.2017-yildagi hal qiluv qarori bilan rad qilingan.
FIB Samarqand viloyat sudi apellyatsiya instansiyasining 07.11.2017-yildagi ajrimi bilan mazkur sud qarori o‘zgarishsiz qoldirilgan.
Shuningdek, 13.10.2017-yildagi FIB Samarqand shahar sudining “Garant quruvchi servis” MChJ foydasiga J.Shomurodovni nizoli binodan chiqarish haqida hal qiluv qarori chiqarilgan.
Shunga asosan, X.Sulaymanova nomidagi Respublika sud-ekspertiza markazi Samarqand viloyatlararo bo‘limi davlat sud eksperti xulosasi bilan J.Shomurodovga tegishli binolar jami 462.564.151 so‘mga baholangan.
“Garant quruvchi servis” MChJ tomonidan J.Shomurodovning onasiga tegishli bo‘lgan eski bino 2018-yil yanvar oyida to‘liq buzilib, shu binoda yashovchi fuqarolarga kompensatsiya to‘lab berilganligi hamda J.Shomurodov va F.Shomurodovlarga yetkazilgan moddiy zarar uchun 462 million so‘mdan ortiqroq pul mablag‘i viloyat IIB moliya bo‘limining depozit hisob raqamiga o‘tkazilgan. J.Shomurodov bir necha bor ogohlantirilishiga qaramay, ushbu pul mablag‘larini olishdan bosh tortib kelgan.
Bundan tashqari, noma’lum shaxslar Samarqand shahri, Gagarin ko‘chasi, 128-uyda joylashgan ko‘p qavatli binodagi J.Shomurodovga tegishli bo‘lgan mulklarni sotish va boshqa harakatlarni amalga oshirish vakolatini beruvchi Rossiya Federatsiyasining notariusi nomidan soxta ishonchnoma rasmiylashtirib, “Garant quruvchi servis” MChJga taqdim qilinganligi holati yuzasidan Samarqand shahri bo‘yicha IIO FMB huzuridagi TB tomonidan 15.06.2017-yilda JKning 228-moddasi 2-qismi “b” bandi bilan jinoyat ishi qo‘zg‘atilib, tergov harakatlari o‘tkazilgan.
Tergov davomida qalbaki hujjatlar N.S. tomonidan taqdim etilganligini tasdiqlovchi dalillarga asosan unga nisbatan JKning 228-moddasi 2-qismi “b” bandi va boshqa moddalar bilan ayblov e’lon qilinib, jinoyat ishi ayblov xulosasi bilan JIB Samarqand shahar sudiga yuborilgan.
Jinoyat ishi sudda ko‘rilib, sudning 27.03.2018-yilgi hukmi bilan N.S.ning ayblovidagi qalbaki hujjatlar tayyorlashga oid qismi yetarli dalillar to‘planmaganligi asosi bilan jinoyat ishining JKning 228-moddasi 2-qismi “b” bandi bilan to‘plangan tergov hujjatlari alohida ish yurituvga ajratilib, qo‘shimcha tergovga yuborilgan.
Tergov jarayonida o‘g‘irlanganligi ko‘rsatilgan mulklarning bir qismi J.Shomuradovning o‘zining uyida saqlanib kelinayotganligi, ushbu jihozlar uning o‘zi tomonidan olib ketilganligi aniqlangan.
Shunga ko‘ra, “Garant quruvchi servis” MChJ rahbarining harakatlarida o‘zgani mulkini yashirin ravishda talon-toroj qilish va mulkni qasddan nobud qilish yoki unga zarar yetkazish jinoyat alomatlari aniqlanmaganligi sababli jinoyat ishining ushbu qismi harakatdan tugatilgan.
O‘tkazilgan tergov davomida Rossiya Federatsiyasining notariusi ishonchnomani qalbakilashtirilganligi holati yuzasidan bo‘lgan jinoyat ishi 24.06.2019-yilda JPKning 84-moddasi 1-qismi 1-bandiga ko‘ra (shaxsni javobgarlikka tortish muddati o‘tganligi bois ayblilik to‘g‘risidagi masalani hal qilmay turib jinoyat ishini tugatish) harakatdan tugatilgan.
Izoh (0)