O‘zbekiston Turizmni rivojlantirish davlat qo‘mitasi “B-Tween” fransuz kompaniyasi bilan hamkorlikda “Paris Premiere” telekanali uchun hujjatli film tayyorlash loyihasi doirasida fransiyalik aktyor Jerar Depardye Qoraqalpog‘istonga tashrif buyurdi. Bu haqda O‘zA xabar berdi.
Bu filmda fransuz aktyori Jerar Depardye bosh rolni ijro etadi. O‘zbekiston to‘g‘risidagi hujjatli filmni suratga olish ishlari O‘zbekistonning oltita shahri — Toshkent, Samarqand, Buxoro, Xiva, Termiz va Nukusda shu yilning 6—26-noyabr kunlari bo‘lib o‘tadi.
Xabar berilishicha, 18-noyabr kuni Jerar Depardye Qoraqalpog‘istonga keldi. Ellikqal’a tumanida mehmon tantanali kutib olindi. So‘ng film ijodkorlari Ayozqal’a tarixiy obidasiga tashrif buyurdi.
“Jerar Depardye sayohati” nomli filmda bosh rolni ijro etayotgan aktyorning tasvirga olish ishlari Nukusdagi Savitskiy muzeyida ham davom etdi.
“Qoraqalpog‘istonda umuman boshqacha kenglik mavjud va bu diyorning sahrolari odamga o‘zgacha kuch bag‘ishlaydi, — deydi aktyor Jerar Depardye. – Eng asosiysi Nukusdagi Savitskiy muzeyida butunjahon ahamiyatga ega san’at asarlari to‘plangan. Igor Savitskiy qiyin zamonlarda, o‘ziga juda xavfli bo‘lib turgan bir paytlarda ushbu asarlarni saqlab qolgani tahsinga sazovordir”.
Ayni paytda Jerar Depardye filmning keyingi qismlarida suratga tushish uchun Orol dengiziga jo‘nab ketgan.
Avvalroq Jerar Depardye O‘zbekistonning Fransiyadagi turizm elchisi etib tayinlangan edi. Shuningdek, Toshkentdagi islom sivilizatsiyasi markazida Jerar Depardye bilan uchrashuv bo‘lib o‘tgan, so‘ng fransuz aktyori Buxorodagi “Poyi Kalon” majmuasida bo‘lib, ushbu madaniy meros obyektini tomosha qilgan. Keyin esa u Xivaga tashrif buyurgan edi.
Izoh (0)