«Гонконгда инсон ҳуқуқлари ва демократия тўғрисидаги» қонун лойиҳаси АҚШ Конгресси томонидан бир овоздан маъқулланди. Бу ҳақда «Интерфакс» хабар берди.
Ҳужжат аввал ушбу лойиҳага айнан ўхшаш ҳужжатни маъқуллаган вакиллар палатасига юборилган. Конгресснинг иккала палатаси қонун лойиҳасини маъқулласа, АҚШ президенти Дональд Трампнинг имзосидан кейин ҳужжат расман тасдиқланади.
Биринчи қонун лойиҳасидан кейин Гонконг полицияси учун қуроллар, кўзни ёшлантирадиган ва ачиштирадиган газ, резина ўқлар ҳамда электрошокерлар етказиб беришни тақиқлаш ҳақидаги ҳужжат лойиҳаси ҳам муҳокамага қўйилади.
Хитой билан савдо келишувини имзолашга уринаётган Трамп ушбу қонунни имзолашдан бош тортиши ҳам мумкин.
Сенат ишлаб чиққан қонун лойиҳасига кўра, АҚШ давлат котиби Майк Помпео йилда камида бир марта Конгрессга Гонконгнинг Қўшма Штатлар билан савдода имтиёзларга эга бўлиш учун етарли даражада автономияга эга эканлиги ҳақида маълумот бериб бориши лозим. Ҳужжатда Гонконгда инсон ҳуқуқларининг поймол бўлишига сабаб бўлган мансабдор шахсларга нисбатан санкциялар қўллаш ҳам кўзда тутилган.
Сенатдаги демократлар етакчиси Чак Шумер ҳужжат лойиҳаси икки палата томонидан кўриб чиқилаётган вақтда Хитой Халқ Республикаси раиси Си Цзинпинга мурожаат йўллангани ва унда Гонконгда, Хитой шимоли-ғарбида бўлаётган воқеалар эътибордан четда эмаслигини маълум қилди.
Мавзуга доир:
Гонконг маҳаллий ҳукумати АҚШ Сенати ва Конгресси томонидан «Гонконгда инсон ҳуқуқлари ва демократия тўғрисидаги» қонун лойиҳаси ишлаб чиқилганидан афсусда эканини билдирди ва ушбу ҳаракат икки томонлама муносабатлар ҳамда америкаликларнинг бизнес манфаатларига путур етказишини маълум қилган. Бу каби ҳужжатлар ортиқча ва бунга йўл қўйиб бўлмайди, дейилади Гонконг ҳукуматининг баёнотида.
«АҚШнинг иқтисодиёт ва савдо сиёсатидаги ҳар қандай бир томонлама ҳаракат икки томон муносабатларига салбий таъсир кўрсатади, америкаликларнинг манфаатига путур етказади» – дейилган Гонконг маҳаллий ҳукуматининг АҚШ ҳаракатига билдирган муносабатида. Шунингдек, ҳукумат мегаполисда АҚШнинг 85 минг нафар фуқаро ва бизнесменлари ҳаёт кечираётгани, 1344 та Америка компанияси фаолият юритаётгани, 278 та АҚШ компанияси Гонконгда ҳудудий штаб-квартираларга эга эканини қайд этган.
«Хорижнинг ҳеч бир қонунчилик органи Гонконгнинг ички сиёсатига аралашмаслиги лозим. Фуқароларнинг хавфсизлигини таъминлаш махсус административ ҳудуд ҳукуматининг конституцион мажбуриятларига киради. Июнь бошидан буён Гонконгда 700 дан ортиқ оммавий норозилик намойишлари ва бошқа оммавий тадбирлар ўтказилди. Якунда ушбу ҳаракатлар зўравонлик ва қонун бузилиши ҳолатларини келтириб чиқарди. Жамоат тартибни сақлаш бевосита полициянинг вазифаси ҳисобланади», — дея таъкидланган маҳаллий ҳукумат баёнотида.
Мавзуга доир:
Гонконгдаги норозилик намойишлари июндан бери давом этмоқда. Норозиликларга маҳаллий ҳукуматнинг экстрадиция қилиш ҳақидаги қонунни имзолашга қарор қилгани сабаб бўлган.
Норозиликлар сабаб аввалига қонунни қабул қилиш кечиктирилган, кейинчалик лойиҳа ҳам бутунлай бекор қилинган. Бироқ полиция ва оломон ўртасидаги тўқнашувларга уланиб кетган норозиликлар ҳали ҳам тўхтагани йўқ, халқ маҳаллий бошқарув органи раҳбарини сайлов йўли билан тайинлашни талаб қилмоқда.
Изоҳ (0)