Toshkent shahar hokimi Jahongir Ortiqxo‘jayevning haqorat va tahdidlari yozilgan audioyozuv atrofidagi muhokamalar davom etmoqda. “Kun.uz” hokim bilan “murosaga borgani”ni, hokimning izohlarini qoniqarli deb qabul qilganini, jamoatchilikdan bu mavzuni ortiq ko‘pirtirmaslikni so‘ragan edi. O‘zbekchani tushunadiganlar-ku bu bayonot ostidagi “boshqa signalchalar”ni tushundi, lekin chet elliklarga buni qanday tushuntirasan? Shuning uchun bir yoqdan Britaniya elchisi, boshqa tomondan Yevropada xavfsizlik va hamkorlik tashkiloti (YeXHT)ning OAV erkinligi bo‘yicha vakili chiqib, o‘z xavotirlarini bildiribdi. Ha-ya, aytmoqchi, YeXHTning Demokratik institutlar va inson huquqlari bo‘yicha byurosi O‘zbekiston qonunchiligini izchil o‘rganib chiqib, mamlakatning “fikr bildirish va axborot erkinligi sohasidagi qonunchilik bazasi qayta ko‘rib chiqilishi kerak” degan xulosa beribdi.
Barqarorlikni O‘zbekiston Xalq demokratik partiyasi yetakchisi Ulug‘bek Inoyatovdan o‘rganing. U besh kishidan iborat oilaga 1 oyda 2,5 million so‘m mablag‘ yetishi haqidagi fikrida sobit qolishini bildiribdi. Faqat bir izohi bor — u 2,5 million so‘m gapirganida, besh kishining faqat oziq-ovqat xarajatlarini nazarda tutgan, bunda, masalan, kommunal to‘lovlar, dam olish, kiyinish va hokazo boshqa xarajatlar nazarda tutilmagan. Aytgancha, partiyalar, ular tomonidan deputatlikka ko‘rsatilgan nomzodlarning biri biridan ajoyib bayonotlari, hayratomuz chiqishlari (va hatto qiliqlari) endi yana ham ko‘payadi — chunki 18-noyabrdan O‘zbekistonda saylovoldi tashviqotlariga rasman start berildi.
O‘zbekistonga 21—24-noyabr kunlari sovuq va nam havo oqimi kirib kelishi kutilmoqda. Vaqti-vaqti bilan yog‘ingarchilik bo‘ladi, ayrim joylarda qorga aylanishi mumkin. Mamlakat bo‘yicha havo harorati kechasi -5...0 darajagacha, ayrim joylarda -8 daraja sovuqqacha tushadi, shimol (Qoraqalpog‘iston va Xorazm)da esa kechasi -15...-10 daraja sovuq bo‘lishi aytilmoqda (sovuq deganda negadir is gazi haqidagi xabarlar ko‘payishidan xavotir bor, afsuski).
Dehqonobodda 43 yildan beri elektr tokisiz faoliyat yuritgan maktab aniqlandi. “Ma’lum bo‘lishicha, maktabda elektr toki mavjud emasligi bilan hech kim qiziqmagan va mutasaddilarga xabar berilmagan”, — deyiladi tuman hokimligi xabarida. 43 yil-a, 43 yil hech kim xabar bermabdimi? 2017-yili, maktab qayta qurilayotganida qayerga qarashgan o‘sha mutasaddilar? Qoyil qolasan-da bularning ajabtovurligiga — maktabni qayta qurgan, lekin elektr o‘tkazmagan. Suratlarga qarab esa iching achishadi — bolalar kurtkalar, qalpoqda o‘tiribdi, sovqotmaslik uchun.T
Lekin, shuncha muammolarga qaramay, O‘zbekiston baribir jozibali. Mana, masalan, Hindistonda bo‘lib o‘tgan India’s Best Awards — 2019 turizm tadbirining “Madaniy-tarixiy meros bo‘yicha eng yaxshi turistik yo‘nalish” nominatsiyasida g‘olib bo‘libdi. Britaniyadagi Titan Travel tur-operatori esa O‘zbekistonni 2020-yilda sayohat qilish uchun eng jozibali va ekzotik yo‘nalishlardan biri sifatida ko‘rsatibdi.
Bayroq mavzusi davom etadi: O‘zbekiston davlat bayrog‘idagi yashirin ma’nolarni bir daqiqalik videorolikdan bilib oling. Aytmoqchi, dunyoda bayrog‘imiz yetib bormagan joyning o‘zi yo‘q. Hatto Antarktidada ham hilpiragan (endi, shu, bir Oy va Marsga ham chiqib kelsa (“Yaratganga shukr” filmida Marsga chiqqani hisobmas), vaqti bo‘lganida...).
Dunyo yangiliklari. AQSh Falastin hududida yahudiy qishloqlarining qurilishini ortiq noqonuniy deb hisoblamasligini bildirdi. Rossiyadagi OAVlarning bosh muharrirlari havola ko‘rsatilgan tashqi saytlardagi so‘kinishlar uchun “Roskomnadzor”dan (O‘zbekistondagi “O‘zkomnazorat”ning Rossiyacha muqobili) jarimalar kelayotganiga shikoyat qildi. Sodir etmagan o‘g‘riliklari uchun 47 yilga qamalgan amerikalik oradan 12 yil o‘tib rafiqasining sa’y-harakatlari bilan ozod etildi. Turkiya Suriya shimoli-sharqida navbatdagi harbiy operatsiyani boshlashi mumkinligini ma’lum qildi. Gruziyadagi norozilik namoyishlarida qo‘lga olingan soni 40 kishiga yaqinlashdi.
Izoh (0)