O‘zbekiston Hindistonda bo‘lib o‘tgan India’s Best Awards — 2019 turizm tadbirining “Madaniy-tarixiy meros bo‘yicha eng yaxshi turistik yo‘nalish” nominatsiyasida g‘olib bo‘ldi. Bu haqda Turizmni rivojlantirish davlat qo‘mitasi tomonidan xabar berildi.

Foto: Turizmni rivojlantirish davlat qo‘mitasi

Ma’lum qilinishicha, India’s Best Awards — 2019 tadbiri “Travel+Leisure” yetakchi xalqaro turistik jurnalining Hindistondagi vakolatxonasi tomonidan o‘tkazildi.

Qo‘mita tomonidan qayd etilishicha, mukofotlar xorijiy davlatlar hamda Hindiston shtatlari bo‘yicha 50 ta nominatsiya bo‘yicha topshirilgan. “Eng yaxshi oilaviy sayohat”, “Asal oyi uchun eng yaxshi yo‘nalish”, “To‘y uchun eng yaxshi yo‘nalish”, “Eng yaxshi kurort-otel” kabi yo‘nalishlar shular jumlasidan. G‘oliblar jurnal o‘quvchilari hamda uning ijtimoiy tarmoqlardagi obunachilari tomonidan onlayn ovoz berish orqali aniqlandi.

Foto: Turizmni rivojlantirish davlat qo‘mitasi

“Travel+Leisure” jurnali AQSh, Avstraliya, Xitoy, Yevropa va Janubi-Sharqiy Osiyo, shuningdek, ko‘plab boshqa davlatlarda chop etiladi. Tadbir doirasida mazkur jurnal muharriri Ayndrila Mitra 2020-yilda O‘zbekistonning turistik salohiyatiga bag‘ishlangan maxsus loyihalarni amalga oshirmoqchi ekanini ma’lum qildi.