“O‘zgidromet” tomonidan ma’lum qilinishicha, 2019-yil sentabr—oktabr oylarida ekilgan hosilning yetilishi va uni yig‘ib olish uchun juda qulay sharoitlar yuzaga keldi.
Markaz tomonidan ta’kidlanishicha, joriy yil kuz ob-havosining ilk belgilari juda kech — noyabr oyining boshida namoyon bo‘ldi.
Qayd etilishicha, birinchi kuzgi ayozlar respublikaning katta qismida 6—7-noyabrda, Qoraqalpog‘istonda oktabrning oxirida kuzatildi. Biroq bu vaqtda kunduzi harorat 13—18 darajagacha, ayrim kunlarda hatto 20—25 darajagacha ko‘tarildi.
“O‘zgidromet” xabarida aytilishicha, noyabrning o‘tgan qismi asosan yog‘ingarchiliksiz bo‘ldi. Faqat noyabrning birinchi besh kunligida respublikaning ayrim joylarida yog‘ingarchilik asosan yomg‘ir ko‘rinishida bo‘lgan, faqat respublikaning tog‘li tumanlari va Qoraqalpog‘iston shimolida birinchi qor yoqqan.
Noyabr oyining o‘tgan davridagi agrometeorologik sharoitlar hosilni yig‘ib olish uchun qulay kelgan. Qulay harorat va kuzgi bug‘doyning o‘z vaqtida sug‘orilishi ularning bir tekis unib chiqishi va rivojlanishini ta’minlagan. Cho‘l yaylovlarida quruq ob-havo tufayli yaylov o‘simliklarining kuzgi rivojlanishi kuzatilmagan, deyiladi markaz xabarida.
Ma’lum qilinishicha, 21—24-noyabrda O‘zbekiston hududiga sovuq va nam havo oqimi kirib keladi. Vaqti-vaqti bilan yog‘ingarchilik bo‘ladi (yomg‘ir, ayrim joylarda qorga aylanadi). Respublika hududi bo‘yicha havo harorati kechasi 0—5 daraja sovuq, ayrim joylarda 8 daraja sovuqqacha tushadi, kunduzi harorat 2 daraja sovuqdan 3 daraja iliqqacha bo‘ladi. Mamlakat shimolida harorat kechasi 10—15 daraja sovuq, kunduzi 2—7 daraja sovuq bo‘lishi kutilmoqda.
Kutilayotgan agrometeorologik sharoitlar mevali o‘simliklar, uzum, tut daraxtlarining uyquga ketishini ta’minlaydi, kuzgi bug‘doy vegetatsiyasini yakunlaydi.
Izoh (0)