Тошкент шаҳар ҳокими Жаҳонгир Ортиқхўжаевнинг ҳақорат ва таҳдидлари ёзилган аудиоёзув атрофидаги муҳокамалар давом этмоқда. «Kun.uz» ҳоким билан «муросага боргани»ни, ҳокимнинг изоҳларини қониқарли деб қабул қилганини, жамоатчиликдан бу мавзуни ортиқ кўпиртирмасликни сўраган эди. Ўзбекчани тушунадиганлар-ку бу баёнот остидаги «бошқа сигналчалар»ни тушунди, лекин чет элликларга буни қандай тушунтирасан? Шунинг учун бир ёқдан Британия элчиси, бошқа томондан Европада хавфсизлик ва ҳамкорлик ташкилоти (ЕХҲТ)нинг ОАВ эркинлиги бўйича вакили чиқиб, ўз хавотирларини билдирибди. Ҳа-я, айтмоқчи, ЕХҲТнинг Демократик институтлар ва инсон ҳуқуқлари бўйича бюроси Ўзбекистон қонунчилигини изчил ўрганиб чиқиб, мамлакатнинг «фикр билдириш ва ахборот эркинлиги соҳасидаги қонунчилик базаси қайта кўриб чиқилиши керак» деган хулоса берибди.
Барқарорликни Ўзбекистон Халқ демократик партияси етакчиси Улуғбек Иноятовдан ўрганинг. У беш кишидан иборат оилага 1 ойда 2,5 миллион сўм маблағ етиши ҳақидаги фикрида собит қолишини билдирибди. Фақат бир изоҳи бор — у 2,5 миллион сўм гапирганида, беш кишининг фақат озиқ-овқат харажатларини назарда тутган, бунда, масалан, коммунал тўловлар, дам олиш, кийиниш ва ҳоказо бошқа харажатлар назарда тутилмаган. Айтганча, партиялар, улар томонидан депутатликка кўрсатилган номзодларнинг бири биридан ажойиб баёнотлари, ҳайратомуз чиқишлари (ва ҳатто қилиқлари) энди яна ҳам кўпаяди — чунки 18 ноябрдан Ўзбекистонда сайловолди ташвиқотларига расман старт берилди.
Ўзбекистонга 21—24 ноябрь кунлари совуқ ва нам ҳаво оқими кириб келиши кутилмоқда. Вақти-вақти билан ёғингарчилик бўлади, айрим жойларда қорга айланиши мумкин. Мамлакат бўйича ҳаво ҳарорати кечаси -5...0 даражагача, айрим жойларда -8 даража совуққача тушади, шимол (Қорақалпоғистон ва Хоразм)да эса кечаси -15...-10 даража совуқ бўлиши айтилмоқда (совуқ деганда негадир ис гази ҳақидаги хабарлар кўпайишидан хавотир бор, афсуски).
Деҳқонободда 43 йилдан бери электр токисиз фаолият юритган мактаб аниқланди. «Маълум бўлишича, мактабда электр токи мавжуд эмаслиги билан ҳеч ким қизиқмаган ва мутасаддиларга хабар берилмаган», — дейилади туман ҳокимлиги хабарида. 43 йил-а, 43 йил ҳеч ким хабар бермабдими? 2017 йили, мактаб қайта қурилаётганида қаерга қарашган ўша мутасаддилар? Қойил қоласан-да буларнинг ажабтовурлигига — мактабни қайта қурган, лекин электр ўтказмаган. Суратларга қараб эса ичинг ачишади — болалар курткалар, қалпоқда ўтирибди, совқотмаслик учун.Т
Лекин, шунча муаммоларга қарамай, Ўзбекистон барибир жозибали. Мана, масалан, Ҳиндистонда бўлиб ўтган India’s Best Awards — 2019 туризм тадбирининг «Маданий-тарихий мерос бўйича энг яхши туристик йўналиш» номинациясида ғолиб бўлибди. Британиядаги Titan Travel тур-оператори эса Ўзбекистонни 2020 йилда саёҳат қилиш учун энг жозибали ва экзотик йўналишлардан бири сифатида кўрсатибди.
Байроқ мавзуси давом этади: Ўзбекистон давлат байроғидаги яширин маъноларни бир дақиқалик видеороликдан билиб олинг. Айтмоқчи, дунёда байроғимиз етиб бормаган жойнинг ўзи йўқ. Ҳатто Антарктидада ҳам ҳилпираган (энди, шу, бир Ой ва Марсга ҳам чиқиб келса («Яратганга шукр» фильмида Марсга чиққани ҳисобмас), вақти бўлганида...).
Дунё янгиликлари. АҚШ Фаластин ҳудудида яҳудий қишлоқларининг қурилишини ортиқ ноқонуний деб ҳисобламаслигини билдирди. Россиядаги ОАВларнинг бош муҳаррирлари ҳавола кўрсатилган ташқи сайтлардаги сўкинишлар учун «Роскомнадзор»дан (Ўзбекистондаги «Ўзкомназорат»нинг Россияча муқобили) жарималар келаётганига шикоят қилди. Содир этмаган ўғриликлари учун 47 йилга қамалган америкалик орадан 12 йил ўтиб рафиқасининг саъй-ҳаракатлари билан озод этилди. Туркия Сурия шимоли-шарқида навбатдаги ҳарбий операцияни бошлаши мумкинлигини маълум қилди. Грузиядаги норозилик намойишларида қўлга олинган сони 40 кишига яқинлашди.
Изоҳ (0)