Milliarder Fattoh Shodiyev Rossiyada “Yil homiysi” unvoniga sazovor bo‘ldi. Bu haqda Moskva davlat xalqaro munosabatlar instituti tomonidan xabar berildi.
Ma’lum qilinishicha, joriy yilning 15-noyabr kuni Sankt-Peterburgda VIII xalqaro madaniyat forumi doirasida “Yil homiysi” mukofotini topshirish bo‘yicha oltinchi marosim bo‘lib o‘tgan.
Asosiy nominatsiyada g‘oliblik 1976-yilda institutning Xalqaro huquq fakultetini tamomlagan, Shodiyev xalqaro jamg‘armasi asoschisi, universitet Vasiylik kengashi a’zosi va Moskva davlat xalqaro munosabatlar instituti jamg‘armasining asoschilaridan biri Fattoh Qayumovich Shodiyevga nasib etgan. Mukofot Rossiyadagi Kabuki teatri truppasining gastroliga bosh homiylik uchun taqdim etildi. Mukofotni Rossiya madaniyat vaziri Vladimir Medinskiy topshirgan.
Qayd etilishicha, Shodiyev xalqaro jamg‘armasi ko‘p yillar davomida Moskva davlat xalqaro munosabatlar instituti bilan hamkorlik qilib keladi hamda talabalarga chet el universitetlarida tahsil olish va amaliyot o‘tish imkoniyatini yaratadi.
Izoh (0)