18-noyabr — O‘zbekiston Davlat bayrog‘i qabul qilingan kun. Shu bois Registonda 100 ta bayroq hilpiradi, Buxorodagi butun boshli bino O‘zbekiston bayrog‘i bilan qoplandi. Ma’lumot uchun, O‘zbekiston nomli davlat bayrog‘i shu vaqtgacha sakkiz marta o‘zgargan, tabiiyki, hozirgisi — eng chiroylisi! Umuman olganda, har xil bayroqlar haqidagi bilimlaringizni mana bu yerda sinab ko‘rishingiz mumkin.
“Ortiqxo‘jayev ishi”: Tongda Jahongir Ortiqxo‘jayev o‘zi haqorat va tahdid qilgan jurnalistlar bilan uchrashgani, tomonlar o‘rtasidagi tushunmovchilikka barham berilgani haqida xabar berilgan edi. Tushlik arafasida esa AOKA Toshkent hokimining haqorat va tahdidlariga to‘laqonli huquqiy baho berilishiga ishonch bildirdi. Umuman olganda, “bosdi-bosdi”.
Statistika qo‘mitasi hisobot beradi: O‘zbekistonda avtomobil ishlab chiqarish hajmi, shuningdek, “inomarka”lar uchun sarflanayotgan pul miqdori ham oshdi. Mashina ko‘paygani bilan, ular uchun mahalliy yonilg‘i masalasining dolzarbligi oshmoqda — 10 oy ichida benzin ishlab chiqarish, neft va gaz qazib olish kamaygan. Umuman olganda esa, chakana savdo aylanmasi so‘nggi 10 oy ichida 7 foizga o‘sgan.
Kun dahshatlari. Farg‘onalik erkak norasmiy xotini bilan birga o‘z ayoli va ikki bolasini tiriklayin kanalga tashlab yuborgan; ijtimoiy tarmoqlarda bir ovcharkani tiriklayin yoqib yuborgan Bahodirning videosi tarqaldi (u haqda ma’lumot bergan shaxsga 2 million so‘m va’da qilingan); Farg‘onada gaz to‘planib qolgan uy portladi (baxtimizga, qurbonlar yo‘q). Qurbonlar Samarqandda — quvurni ta’mirlayotgan ikki ishchi tuproq bosib qolishi oqibatida halok bo‘ldi.
O‘zbekistonda yana nima yangiliklar? O‘zbekistonda havo keskin sovib, ayrim joylarda qor yog‘adi. Dollarning rasmiy kursi 9500 so‘mdan oshdi. Bosh prokuratura 1 oy ichida 3 bemorning o‘limi qayd etilgan xususiy klinika shifokorlariga nisbatan jinoyat ishi qo‘zg‘atdi. Mamlakatda spirtli ichimliklarni sotish erkinlashtirildi. Qashqadaryoda Afg‘oniston fuqarolari YTHga uchradi. Toshkentdagi “Matbuotchilar uyi” yana sotuvga qo‘yildi. Toshkentda 200 dan ortiq kishini 7 milliard so‘mga chuv tushirgan aka-uka sudlandi. Angrenda esa kredit va lizingga mashina olib berishni va’da qilib, 61 kishini aldagan firibgarlar qo‘lga olindi.
Jahonda-chi? Polshada sodir bo‘lgan YTH oqibatida O‘zbekiston fuqarosi og‘ir jarohat oldi. Pokistonda terrorchilik guruhiga a’zo bo‘lgan o‘zbekistonlik erkak 9 yilga qamaldi. Turkmaniston—O‘zbekiston chegarasida turkmanistonlik politsiyachilar va bojxona xodimlari mushtlashdi. Tramp Kim Chen In bilan yaqin orada uchrashishini ma’lum qildi. Britaniyalik harbiylar Iroq va Afg‘onistonda tinch aholi vakillarini o‘ldirgan. Marokash maxsus xizmati terakt amalga oshirishni rejalashtirgan IShID vakillarini hibsga oldi. Qozog‘iston TIV Suriya bo‘yicha muzokaralarning dekabr boshida o‘tkazilishini ma’lum qildi. Peru cho‘llaridan yana ulkan jumboqli suratlar topildi. Avstraliyada tuxum kattaligida do‘l yog‘di.
Futbol: O‘zbekiston — Falastin to‘qnashuvi oldidan. Bosh murabbiy Vadim Abramov vazifa o‘zgarmaganini ma’lum qildi (falastinliklar bosh murabbiyi ham 18-noyabr kuni 17:00 da boshlanadigan o‘yinda faqat g‘alaba haqida o‘ylayotganini yashirmadi). Yetakchi yarim himoyachilarimizdan biri Jaloliddin Masharipov Saudiyaga qarshi o‘yindagi mag‘lubiyatdan so‘ng muxlislar oldida uyatli ekanini tan oldi. Aytmoqchi, bahraynlik hakamlar boshqarib boradigan o‘yinda markaziy himoyachi Yegor Krimets O‘zbekistonga yordam bera olmaydi.
Izoh (0)