Britaniyalik harbiylar Iroq va Afg‘onistonda tinch aholi vakillarini o‘ldirgan. Mudofaa vazirligi ushbu harbiy jinoyatlar yuzasidan tergov o‘tkazmagan

Buyuk Britaniya hukumati va armiyasi Afg‘oniston hamda Iroq hududida tinch aholi vakillarini o‘ldirgan harbiylar va maxsus qo‘shin askarlarini sud qilmoqchi emas. BBC hamda The Sunday Times bu borada jurnalist surishtiruvi o‘tkazgan.

Jurnalistlar tekshiruv davomida britaniyalik harbiylarning mahalliy aholi vakillarini qiynoqqa solgani va o‘ldirgani yuzasidan hujjatlar hamda boshqa dalillar topgan. Ular IHAT tergovchilar guruhi bergan axborot hamda 2014-yilda ochilgan Britaniya harbiy politsiyasining “Nortmur operatsiyasi”ga asoslanmoqda.

IHAT’ga mingdan ortiq ishlarni topshirgan advokat Fil Shayner Iroqda noqonuniy yo‘l bilan mijoz izlashda ishtirok etganlikda ayblanib 2017-yilda yuridik amaliyotdan chetlatilganidan so‘ng Buyuk Britaniya hukumati ikkala tergov ishini ham yopdi. Biroq tergov o‘tkazgan sobiq izquvarlar Shayner ishni yopish uchun bahona bo‘lganligini bildirmoqda. Ular armiya va hukumat harbiylarning aybdorligini isbotlash imkoniyatini bermagani, jinoyatchilar sud ham qilinmaganidan norozi.

“Mudofaa vazirligi aybdorligi isbotlangan va jazo olishi muqarrar bo‘lgan harbiylardan tashqari, gumonlanuvchilarni sud tartibi doirasida jazoga tortmagan”, — deydi izquvarlardan biri.

Tergovchilar SAS Britaniya maxsus qo‘shini vakillarining 2012-yilda Afg‘onistondagi xonadonlardan birida choy ichgandan keyin to‘rt nafar voyaga yetmagan bolalarni otib o‘ldirganligiga dalillar borligini ta’kidlagan. Qotillikdan keyin ular “Tolibon” harakatining vakillari bo‘lgani e’lon qilindi. Yana bir ishda 2003-yilda Iroqning Basra shahrida harbiylar tomonidan mahalliy politsiyachining o‘ldirilgani bayon etilgan. Biroq hujjatlarda ushbu voqeaning haqiqiy aybdori basralik politsiyachi bo‘lgani qayd etilib, tergov to‘xtatilgan. Yana bir nechta jinoiy ishlar Iroqda Shotlandiyaning Black Watch quruqlikdagi botalyoni askarlarining aholini qiynoqqa solib, ayollarni zo‘rlagani yuzasidan ochilgan.

Britaniya hukumati va mudofaa vazirligi ushbu ayblovlarni inkor etgan holda barcha ishlar qonun doirasida o‘rganib chiqilganligini ma’lum qilgan.