Буюк Британия ҳукумати ва армияси Афғонистон ҳамда Ироқ ҳудудида тинч аҳоли вакилларини ўлдирган ҳарбийлар ва махсус қўшин аскарларини суд қилмоқчи эмас. BBC ҳамда The Sunday Times бу борада журналист суриштируви ўтказган.
Журналистлар текширув давомида британиялик ҳарбийларнинг маҳаллий аҳоли вакилларини қийноққа солгани ва ўлдиргани юзасидан ҳужжатлар ҳамда бошқа далиллар топган. Улар IHAT терговчилар гуруҳи берган ахборот ҳамда 2014 йилда очилган Британия ҳарбий полициясининг «Нортмур операцияси»га асосланмоқда.
IHATга мингдан ортиқ ишларни топширган адвокат Фил Шайнер Ироқда ноқонуний йўл билан мижоз излашда иштирок этганликда айбланиб 2017 йилда юридик амалиётдан четлатилганидан сўнг Буюк Британия ҳукумати иккала тергов ишини ҳам ёпди. Бироқ тергов ўтказган собиқ изқуварлар Шайнер ишни ёпиш учун баҳона бўлганлигини билдирмоқда. Улар армия ва ҳукумат ҳарбийларнинг айбдорлигини исботлаш имкониятини бермагани, жиноятчилар суд ҳам қилинмаганидан норози.
«Мудофаа вазирлиги айбдорлиги исботланган ва жазо олиши муқаррар бўлган ҳарбийлардан ташқари, гумонланувчиларни суд тартиби доирасида жазога тортмаган», — дейди изқуварлардан бири.
Терговчилар SAS Британия махсус қўшини вакилларининг 2012 йилда Афғонистондаги хонадонлардан бирида чой ичгандан кейин тўрт нафар вояга етмаган болаларни отиб ўлдирганлигига далиллар борлигини таъкидлаган. Қотилликдан кейин улар «Толибон» ҳаракатининг вакиллари бўлгани эълон қилинди. Яна бир ишда 2003 йилда Ироқнинг Басра шаҳрида ҳарбийлар томонидан маҳаллий полициячининг ўлдирилгани баён этилган. Бироқ ҳужжатларда ушбу воқеанинг ҳақиқий айбдори басралик полициячи бўлгани қайд этилиб, тергов тўхтатилган. Яна бир нечта жиноий ишлар Ироқда Шотландиянинг Black Watch қуруқликдаги боталёни аскарларининг аҳолини қийноққа солиб, аёлларни зўрлагани юзасидан очилган.
Британия ҳукумати ва мудофаа вазирлиги ушбу айбловларни инкор этган ҳолда барча ишлар қонун доирасида ўрганиб чиқилганлигини маълум қилган.
Изоҳ (0)