Bugun, 13-noyabr kuni poytaxtdagi “O‘zekspomarkaz”da “Ipak yo‘lida turizm” XXV Toshkent Xalqaro turizm yarmarkasiga start berildi, deb xabar bermoqda Turizmni rivojlantirish davlat qo‘mitasi.
Tadbirni Turizmni rivojlantirish davlat qo‘mitasi raisi vazifasini bajaruvchi Abdulaziz Aqqulov, UNWTO’ning Yevropa mamlakatlari departamenti direktori Piter Yanich hamda Toshkent shahar hokimi Jahongir Ortiqxo‘jayev ochib berdi.
Qo‘mita raisining ta’kidlashicha, turistlarga xizmat ko‘rsatuvchi tadbirkorlik subyektlari sonining ortishi bilan bir qatorda yaratilayotgan ishchi o‘rinlari soni ham mos ravishda ortib bormoqda.
Ayni damda yarmarkada 85 stend o‘rnatilib, ularning orasidan respublikaning 14 hududi, turli sohaviy tashkilotlar, turoperatorlar, mehmonxonalar va otellar, transport kompaniyalari, o‘quv muassasalari, NNT va boshqa tashkilotlar stendlari o‘rin olgan. Tadbirga 26 mamlakatdan xorijiy ishtirokchilar tashrif buyurgan. Fransiya, Isroil, Koreya respublikasi, Turkiya, Rossiya, Singapur, Qozog‘iston, Indoneziya, Belarus, Malayziya, Eron shular jumlasidandir.
Toshkent xalqaro turistik ko‘rgazmasining rang-barang dasturi madaniy-ko‘ngilochar hamda biznes-uchrashuvlarni o‘z ichiga oladi. Uch kun davomida Ko‘rgazma ishtirokchilari va mehmonlari Milliy pavilyonda mamlataktning har bir hududi turistik salohiyati hamda “Hunarmandlar shaharchasi” ekspozitsiyasida O‘zbekistonning xalq amaliy san’ati bilan tanishishi mumkin.
Ishtirokchilar, shuningdek, “Ipak yo‘li ta’mi” festivalida o‘zbek milliy taomlaridan tatib ko‘rib, “Sharq bozori”ni ko‘zdan kechiradi. Dastur doirasida TXTKda birinchi marta O‘zbekistonning turistik brend elchilari xalqaro forumi hamda O‘zbekiston—Rossiya turizm forumi kabi tadbirlar bo‘lib o‘tadi.
Izoh (0)