Бугун, 13 ноябрь куни пойтахтдаги «Ўзэкспомарказ»да «Ипак йўлида туризм» XXV Тошкент Халқаро туризм ярмаркасига старт берилди, деб хабар бермоқда Туризмни ривожлантириш давлат қўмитаси.
Тадбирни Туризмни ривожлантириш давлат қўмитаси раиси вазифасини бажарувчи Абдулазиз Аққулов, UNWTO’нинг Европа мамлакатлари департаменти директори Питер Янич ҳамда Тошкент шаҳар ҳокими Жаҳонгир Ортиқхўжаев очиб берди.
Қўмита раисининг таъкидлашича, туристларга хизмат кўрсатувчи тадбиркорлик субъектлари сонининг ортиши билан бир қаторда яратилаётган ишчи ўринлари сони ҳам мос равишда ортиб бормоқда.
Айни дамда ярмаркада 85 стенд ўрнатилиб, уларнинг орасидан республиканинг 14 ҳудуди, турли соҳавий ташкилотлар, туроператорлар, меҳмонхоналар ва отеллар, транспорт компаниялари, ўқув муассасалари, NNТ ва бошқа ташкилотлар стендлари ўрин олган. Тадбирга 26 мамлакатдан хорижий иштирокчилар ташриф буюрган. Франция, Исроил, Корея республикаси, Туркия, Россия, Сингапур, Қозоғистон, Индонезия, Беларусь, Малайзия, Эрон шулар жумласидандир.
Тошкент халқаро туристик кўргазмасининг ранг-баранг дастури маданий-кўнгилочар ҳамда бизнес-учрашувларни ўз ичига олади. Уч кун давомида Кўргазма иштирокчилари ва меҳмонлари Миллий павильонда мамлатактнинг ҳар бир ҳудуди туристик салоҳияти ҳамда «Ҳунармандлар шаҳарчаси» экспозициясида Ўзбекистоннинг халқ амалий санъати билан танишиши мумкин.
Иштирокчилар, шунингдек, «Ипак йўли таъми» фестивалида ўзбек миллий таомларидан татиб кўриб, «Шарқ бозори»ни кўздан кечиради. Дастур доирасида ТХТКда биринчи марта Ўзбекистоннинг туристик бренд элчилари халқаро форуми ҳамда Ўзбекистон—Россия туризм форуми каби тадбирлар бўлиб ўтади.
Изоҳ (0)