Toshkentda tadbirkorga ikkita yer uchastkasini ajratib berishga va’da qilib Bosh vazir Abdulla Aripov, Toshkent shahar hokimi Jahongir Ortiqxo‘jayev imzosini qalbakilashtirib yarim million dollarni qo‘lga kiritgan shaxslar aniqlandi.
Oliy sudi matbuot xizmati rahbari Aziz Obidovning “Daryo”ga ma’lum qilishicha, Jinoyat ishlari bo‘yicha Toshkent shahar Shayxontohur tuman sudida 23-oktabr kuni A.A., A.K., A..A., T.S. va R.M.ga nisbatan jinoyat ishi ko‘rib chiqildi.
Sudlanganlardan ikki nafari Toshkent shahar Chilonzor tumani hokimligi qurilish bo‘lim boshlig‘i lavozimida ishlagan, ikkitasi vaqtincha ishsiz va bir nafari huquqshunos bo‘lgan.
Ma’lum bo‘lishicha, sudlanuvchi A.A. va Toshkent shahar Chilonzor tumani hokimligi qurilish bo‘lim boshlig‘i A.K.lar bir guruh bo‘lib, 2017-yil fevral oyida A.A.ga A.K.ni Vazirlar Mahkamasi xodimi sifatida tanishtirgan va jabrlanuvchi G.G.ni hamda fuqaroviy da’vogar B.F.ni pora berishga dalolat qilib, hokimlikda yuqori mansablarda ishlaydigan shaxslar orqali Chilonzor tumani, Muqumiy ko‘chasida joylashgan 0,93 gektar hamda Yashnobod tumani, Shahrisabz ko‘chasida joylashgan 0,26 gektar yer maydonlarining har bir sotixiga 10 ming dollardan hisoblab, jami 1 million 190 ming dollarga Toshkent shahar hokimining egalik qilish huquqini beruvchi qarorini chiqartirib berishni va’da qilgan.
Shuningdek, 2018-yil iyun oyida yer ajratilishi yuzasidan ishlarni amalga oshirayotganiga G.G.ni ishontirish uchun Bosh vazir Abdulla Aripovning nomi bilan soxta bayonnoma rasmiylashtirilib, G.G.ga taqdim etilgan.
Shu bilan birga 2018-yil sentabr oyida yer ajratilishi yuzasidan ishlarni amalga oshirayotganliklariga ishontirish uchun A.K. yer maydonlari ajratilishiga ruxsat beruvchi Toshkent shahar hokimi Jahongir Ortiqxo‘jayev va hokimlikning mas’ul xodimlarining nomi ko‘rsatilgan soxta qarorni tuzib, unga taqdim etgan jabrlanuvchidan jami 527 ming dollarni olgan, qolgan 663 ming dollarni qo‘lga kiritishidan avval qo‘lga tushgan.
Sud jinoyat ishi materiallarini har tomonlama va to‘liq o‘rganib, T. J.ni Jinoyat kodeksining 168-moddasi 4-qismi “a” bandi, 25,168-moddasi 4-qismi “a” bandi va 28, 211-moddasi 3-qismi “a” bandida, K. A.ni Jinoyat kodeksining 25, 168-moddasi 4-qismi “a” bandi va 28, 211-moddasi 3-qismi “a” bandi va 228-moddasi 2-qismi “a”, “b” bandlarida, A. A.ni Jinoyat kodeksining 25, 168-moddasi 4-qismi “a” bandida, S. T.ni Jinoyat kodeksining 25, 168-moddasi 4-qismi “a” bandida, M.R.ni Jinoyat kodeksining 168-moddasi 4-qismi “a” bandida nazarda tutilgan jinoyatlarni sodir etganlikda aybdor deb topdi.
E’lon qilingan sud hukmiga ko‘ra:
- T.J.ga Jinoyat kodeksining 59-moddasi tartibida uzil-kesil o‘tash uchun 5 yil 6 oy muddatga ozodlikdan mahrum qilish jazosi tayinlandi. Tayinlangan jazo umumiy tartibli koloniyalarda o‘tattirish belgilandi.
- K.A.ga Jinoyat kodeksining 59-moddasi tartibida uzil-kesil o‘tash uchun 1 yil muddatga muayyan huquqdan mahrum qilib, ya’ni davlat organlari, tashkilotlari va muassasalarida mansabdorlik lavozimlarida ishlash huquqidan mahrum qilish jazosi va 5 yil 6 oy muddatga ozodlikdan mahrum qilish jazosi tayinlandi. Tayinlangan jazo umumiy tartibli koloniyalarda o‘tattirish belgilandi.
- A.A.ga Jinoyat kodeksining 57-moddasini qo‘llab, eng kam oylik ish haqining 100 baravari miqdorida jarima jazosi tayinlandi.
- S.T.ga Jinoyat kodeksining 45-moddasini qo‘llab, 1 yil muddatga muayyan huquqdan mahrum qilib, ya’ni davlat organlari, tashkilotlari va muassasalarida mansabdorlik lavozimlarida ishlash huquqidan mahrum qilish jazosi va 57-moddasini qo‘llab, eng kam oylik ish haqining 100 baravari miqdorida jarima jazosi tayinlandi.
- M.R.ga Jinoyat kodeksining 57-moddasini qo‘llab, eng kam oylik ish haqining 100 baravari miqdorida jarima jazosi tayinlandi.
Izoh (0)