O‘zbekiston Tashqi ishlar vaziri Abdulaziz Komilov 11-noyabr kuni Belgiyaning Brussel shahrida Yevropa Ittifoqiga raislik qilayotgan Finlandiya Tashqi ishlar vaziri Pekka Haavisto bilan uchrashdi.
TIV matbuot xizmatining xabar berishicha, uchrashuv davomida O‘zbekiston—YeI Hamkorlik kengashining 15-majlisi kun tartibiga kiritilgan masalalar ko‘rib chiqildi.
O‘zbekiston—Finlandiya munosabatlarining bugungi holati va rivojlantirish istiqbollariga alohida e’tibor qaratildi. Tomonlar parlamentlararo aloqalar, savdo-iqtisodiy va investitsion hamkorlik, fan, madaniyat, ta’lim kabi dolzarb yo‘nalishlarda hamkorlikni kengaytirishga tayyor ekanliklarini ta’kidladi va shartnomaviy-huquqiy asosni mustahkamlashni qo‘llab-quvvatladi.
Shuningdek, savdo-iqtisodiy hamkorlik bo‘yicha hukumatlararo komissiya ishini qayta tiklash, Xelsinki shahrida O‘zbekistonda savdo uyini ochish va boshqa qo‘shma loyihalarni amalga oshirish belgilangan maqsadlarni amalga oshirishning amaliy shakli bo‘lishi mumkinligi ta’kidlandi. Vazirlar xalqaro siyosatga doir ba’zi masalalar yuzasidan ham fikr almashgan.
Bundan avval Abdulaziz Komilov boshchiligidagi delegatsiya Belgiyaga borishi xabar berilgan edi.
Izoh (0)