Тошкентда тадбиркорга иккита ер участкасини ажратиб беришга ваъда қилиб Бош вазир Абдулла Арипов, Тошкент шаҳар ҳокими Жаҳонгир Ортиқхўжаев имзосини қалбакилаштириб ярим миллион долларни қўлга киритган шахслар аниқланди.
Олий суди матбуот хизмати раҳбари Азиз Обидовнинг «Дарё»га маълум қилишича, Жиноят ишлари бўйича Тошкент шаҳар Шайхонтоҳур туман судида 23 октябрь куни А.А., А.К., А..А., Т.С. ва Р.М.га нисбатан жиноят иши кўриб чиқилди.
Судланганлардан икки нафари Тошкент шаҳар Чилонзор тумани ҳокимлиги қурилиш бўлим бошлиғи лавозимида ишлаган, иккитаси вақтинча ишсиз ва бир нафари ҳуқуқшунос бўлган.
Маълум бўлишича, судланувчи А.А. ва Тошкент шаҳар Чилонзор тумани ҳокимлиги қурилиш бўлим бошлиғи А.К.лар бир гуруҳ бўлиб, 2017 йил февраль ойида А.А.га А.К.ни Вазирлар Маҳкамаси ходими сифатида таништирган ва жабрланувчи Г.Г.ни ҳамда фуқаровий даъвогар Б.Ф.ни пора беришга далолат қилиб, ҳокимликда юқори мансабларда ишлайдиган шахслар орқали Чилонзор тумани, Муқумий кўчасида жойлашган 0,93 гектар ҳамда Яшнобод тумани, Шаҳрисабз кўчасида жойлашган 0,26 гектар ер майдонларининг ҳар бир сотихига 10 минг доллардан ҳисоблаб, жами 1 миллион 190 минг долларга Тошкент шаҳар ҳокимининг эгалик қилиш ҳуқуқини берувчи қарорини чиқартириб беришни ваъда қилган.
Шунингдек, 2018 йил июнь ойида ер ажратилиши юзасидан ишларни амалга ошираётганига Г.Г.ни ишонтириш учун Бош вазир Абдулла Ариповнинг номи билан сохта баённома расмийлаштирилиб, Г.Г.га тақдим этилган.
Шу билан бирга 2018 йил сентябрь ойида ер ажратилиши юзасидан ишларни амалга ошираётганликларига ишонтириш учун А.К. ер майдонлари ажратилишига рухсат берувчи Тошкент шаҳар ҳокими Жаҳонгир Ортиқхўжаев ва ҳокимликнинг масъул ходимларининг номи кўрсатилган сохта қарорни тузиб, унга тақдим этган жабрланувчидан жами 527 минг долларни олган, қолган 663 минг долларни қўлга киритишидан аввал қўлга тушган.
Суд жиноят иши материалларини ҳар томонлама ва тўлиқ ўрганиб, Т. Ж.ни Жиноят кодексининг 168-моддаси 4-қисми «а» банди, 25,168-моддаси 4-қисми «а» банди ва 28, 211-моддаси 3-қисми «а» бандида, К. А.ни Жиноят кодексининг 25, 168-моддаси 4-қисми «а» банди ва 28, 211-моддаси 3-қисми «а» банди ва 228-моддаси 2-қисми «а», «б» бандларида, А. А.ни Жиноят кодексининг 25, 168-моддаси 4-қисми «а» бандида, С. Т.ни Жиноят кодексининг 25, 168-моддаси 4-қисми «а» бандида, М.Р.ни Жиноят кодексининг 168-моддаси 4-қисми «а» бандида назарда тутилган жиноятларни содир этганликда айбдор деб топди.
Эълон қилинган суд ҳукмига кўра:
- Т.Ж.га Жиноят кодексининг 59-моддаси тартибида узил-кесил ўташ учун 5 йил 6 ой муддатга озодликдан маҳрум қилиш жазоси тайинланди. Тайинланган жазо умумий тартибли колонияларда ўтаттириш белгиланди.
- К.А.га Жиноят кодексининг 59-моддаси тартибида узил-кесил ўташ учун 1 йил муддатга муайян ҳуқуқдан маҳрум қилиб, яъни давлат органлари, ташкилотлари ва муассасаларида мансабдорлик лавозимларида ишлаш ҳуқуқидан маҳрум қилиш жазоси ва 5 йил 6 ой муддатга озодликдан маҳрум қилиш жазоси тайинланди. Тайинланган жазо умумий тартибли колонияларда ўтаттириш белгиланди.
- А.А.га Жиноят кодексининг 57-моддасини қўллаб, энг кам ойлик иш ҳақининг 100 баравари миқдорида жарима жазоси тайинланди.
- С.Т.га Жиноят кодексининг 45-моддасини қўллаб, 1 йил муддатга муайян ҳуқуқдан маҳрум қилиб, яъни давлат органлари, ташкилотлари ва муассасаларида мансабдорлик лавозимларида ишлаш ҳуқуқидан маҳрум қилиш жазоси ва 57-моддасини қўллаб, энг кам ойлик иш ҳақининг 100 баравари миқдорида жарима жазоси тайинланди.
- М.Р.га Жиноят кодексининг 57-моддасини қўллаб, энг кам ойлик иш ҳақининг 100 баравари миқдорида жарима жазоси тайинланди.
Изоҳ (0)