Ijtimoiy tarmoqlarda 4-noyabrdan 5-noyabrga o‘tar kechasi Toshkentdagi sobiq “Abu Saxiy” bozori atrofida uysiz qolgan keksa yoshdagi ayol ko‘chada yotib, kun kechirayotgani haqida videoxabar tarqaldi. O‘zbekiston Xotin-qizlar qo‘mitasi mazkur xabarni o‘rgandi.
Ma’lum bo‘lishicha, o‘zini avvaliga farg‘onalik Shamsiyeva Klara Tojiboyevna deb tanishtirgan, Farg‘onada qarindoshlari, kattagina uchastkasi bor ekanligini aytgan bu ayol aslida parkentlik Tojiboyeva Mahmuda Toshkanboyevna bo‘lib chiqqan.
O‘rganishlar natijasiga ko‘ra, Mahmuda Tojiboyeva 2019-yil 8-avgust kuni Chilonzor tumani ma’muriy sudining qaroriga binoan Toshkent shahar ichki ishlar bosh boshqarmasining Reabilitatsiya markaziga joylashtirilgan. Keksa ayol markazdan chiqqach, yana bozorlarda tilamchilik qilib, tunlari bozor atrofida yotib yurgan.
Mahmuda Tojiboyeva 5-noyabr, seshanba kuni O‘zbekiston Xotin-qizlar qo‘mitasining Zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish Respublika markazi qoshidagi Toshkent shahar reabilitatsiya qilish va moslashtirish markaziga joylashtirildi. Bu yerda ayolning yuvinib olishiga imkoniyat yaratilgan, unga yangi kiyim-bosh berilgan, ovqatlantirilgan, psixolog va tibbiyot xodimlari uning salomatligi borasida ish olib borgan.
Bir necha soat davom etgan qidiruv ishlaridan so‘ng ayolning yaqinlari topilib, ularga Mahmuda Tojiboyevaning turgan joyi haqida ma’lum qilingan. Kechki soat 20:00 da anchadan buyon bozorlarda yotib yurgan bu ayol qarindosh-urug‘lari bilan Parkent tumaniga kuzatib qo‘yilgan.
Izoh (0)