Ижтимоий тармоқларда 4 ноябрдан 5 ноябрга ўтар кечаси Тошкентдаги собиқ «Абу Сахий» бозори атрофида уйсиз қолган кекса ёшдаги аёл кўчада ётиб, кун кечираётгани ҳақида видеохабар тарқалди. Ўзбекистон Хотин-қизлар қўмитаси мазкур хабарни ўрганди.
Маълум бўлишича, ўзини аввалига фарғоналик Шамсиева Клара Тожибоевна деб таништирган, Фарғонада қариндошлари, каттагина участкаси бор эканлигини айтган бу аёл аслида паркентлик Тожибоева Маҳмуда Тошканбоевна бўлиб чиққан.
Ўрганишлар натижасига кўра, Маҳмуда Тожибоева 2019 йил 8 август куни Чилонзор тумани маъмурий судининг қарорига биноан Тошкент шаҳар ички ишлар бош бошқармасининг Реабилитация марказига жойлаштирилган. Кекса аёл марказдан чиққач, яна бозорларда тиламчилик қилиб, тунлари бозор атрофида ётиб юрган.
Маҳмуда Тожибоева 5 ноябрь, сешанба куни Ўзбекистон Хотин-қизлар қўмитасининг Зўрлик ишлатишдан жабр кўрган шахсларни реабилитация қилиш ва мослаштириш ҳамда ўз жонига қасд қилишнинг олдини олиш Республика маркази қошидаги Тошкент шаҳар реабилитация қилиш ва мослаштириш марказига жойлаштирилди. Бу ерда аёлнинг ювиниб олишига имконият яратилган, унга янги кийим-бош берилган, овқатлантирилган, психолог ва тиббиёт ходимлари унинг саломатлиги борасида иш олиб борган.
Бир неча соат давом этган қидирув ишларидан сўнг аёлнинг яқинлари топилиб, уларга Маҳмуда Тожибоеванинг турган жойи ҳақида маълум қилинган. Кечки соат 20:00 да анчадан буён бозорларда ётиб юрган бу аёл қариндош-уруғлари билан Паркент туманига кузатиб қўйилган.
Изоҳ (0)