Mo‘guliston 29-oktabrda, 30-oktabrga o‘tar kechasi Ulan-Batordagi maxsus operatsiya vaqtida hibsga olingan 758 nafar Xitoy fuqarosini 2-noyabr, shanba kuni deportatsiya qildi. Bu haqda Regnum xabar berdi.
Deportatsiyani Mo‘guliston politsiyasi, razvedkasi va bojxona xizmati tashkillashtirdi.
“Maxsus operatsiyadan keyin qo‘lga olingan Xitoy fuqarolari politsiyachilar nazorati ostida mehmonxonalarda qoldirildi. Ular mehmonxonalardan huquq-tartibot organlari xodimlari nazoratida bojxona va politsiya tekshiruvidan o‘tkazildi. Har bir vagonga politsiyachilar biriktiriladi. Poyezd kuchaytirilgan himoya ostida Zamin-Uud chegara punktiga yetkaziladi va u yerda xitoyliklarni XXR huquqni muhofaza qiluvchi xodimlari kutib oladi”, — deyilgan Mo‘g‘iliston politsiya bosh boshqarmasi matbuot xizmati bayonotida.
Deportatsiya bo‘yicha operatsiyada 30 dan ortiq avtobus va 20 ta vagon band qilingan. Xitoyliklarni Chin yurtiga qaytarish bo‘yicha 60 million tugrik (Mo‘guliston pul birligi) miqdoridagi mablag‘ Xitoy elchixonasi tomonidan to‘lab berilgan.
Avval Mo‘guliston razvedkasi hamda politsiya xodimlari to‘rtta mehmonxonada o‘tkazgan reydlar natijasida 750 nafar Xitoy xalq respublikasining fuqarosini hibsga olgani, ularning 1000 dan ortiq yuqori ishlab chiqarish tezligiga ega kompyuterlar hamda 10 mingta mobil telefon yordamida kiberjinoyatlar sodir etganlikda ayblanayotganligi xabar qilingandi.Mamlakatning bosh razvedka boshqarmasi ma’lumotiga ko‘ra, deportatsiya qilingan XXR fuqarolari 2019-yil avgustidan beri turistlik vizasi bilan istiqomat qilgan va bu Mo‘guliston qonunchiligiga zid holat.
Izoh (0)