Мўгулистон 29 октябрда, 30 октябрга ўтар кечаси Улан-Батордаги махсус операция вақтида ҳибсга олинган 758 нафар Хитой фуқаросини 2 ноябрь, шанба куни депортация қилди. Бу ҳақда Regnum хабар берди.
Депортацияни Мўгулистон полицияси, разведкаси ва божхона хизмати ташкиллаштирди.
«Махсус операциядан кейин қўлга олинган Хитой фуқаролари полициячилар назорати остида меҳмонхоналарда қолдирилди. Улар меҳмонхоналардан ҳуқуқ-тартибот органлари ходимлари назоратида божхона ва полиция текширувидан ўтказилди. Ҳар бир вагонга полициячилар бириктирилади. Поезд кучайтирилган ҳимоя остида Замин-Ууд чегара пунктига етказилади ва у ерда хитойликларни ХХР ҳуқуқни муҳофаза қилувчи ходимлари кутиб олади», — дейилган Мўғилистон полиция бош бошқармаси матбуот хизмати баёнотида.
Депортация бўйича операцияда 30 дан ортиқ автобус ва 20 та вагон банд қилинган. Хитойликларни Чин юртига қайтариш бўйича 60 миллион тугрик (Мўгулистон пул бирлиги) миқдоридаги маблағ Хитой элчихонаси томонидан тўлаб берилган.
Аввал Мўгулистон разведкаси ҳамда полиция ходимлари тўртта меҳмонхонада ўтказган рейдлар натижасида 750 нафар Хитой халқ республикасининг фуқаросини ҳибсга олгани, уларнинг 1000 дан ортиқ юқори ишлаб чиқариш тезлигига эга компьютерлар ҳамда 10 мингта мобил телефон ёрдамида кибержиноятлар содир этганликда айбланаётганлиги хабар қилинганди.Мамлакатнинг бош разведка бошқармаси маълумотига кўра, депортация қилинган ХХР фуқаролари 2019 йил августидан бери туристлик визаси билан истиқомат қилган ва бу Мўгулистон қонунчилигига зид ҳолат.
Изоҳ (0)