Шанхай ҳамкорлик ташкилоти ташкилотнинг барча аъзолари ўртасида мавжуд ҳамкорлик ва якдил ҳаракатлар асосида террорчиликка қарши кураш бўйича минтақавий стратегияни ишлаб чиқиши мақсадга мувофиқдир. Ушбу таклиф ШҲТ Ҳукумат раҳбарлари кенгашининг 2 ноябрь куни Тошкентда бўлиб ўтган мажлисида Афғонистон бош вазири Абдулла Абдулла томонидан билдирилди (Афғонистон ШҲТда кузатувчи мақомига эга).
Абдулла Абдулланинг қайд этишича, Афғонистоннинг ўзи ҳам самарали аксилтеррор стратегиясини ишлаб чиқишга ҳаракат қилмоқда. Шу нуқтаи назардан минтақавий миқёсда ҳамкорликни йўлга қўйиш таклифи террорчилик ва унга турдош муаммоларга қарши биргаликда курашиш учун ҳам зарурдир.
Бош вазир Абдулла Абдулла Афғонистонда тинчликка эришиш йўлида Россия, АҚШ, Европа Иттифоқи, Ўзбекистон ва Хитой томонидан кўрсатилаётган кўмак ва қўллов учун миннатдорлик билдирди, дея хабар бермоқда «Gazeta.uz».
Абдулла Абдулланинг қайд этишича, Афғонистон ШҲТнинг қисмларини боғлаб турувчи муҳим бир унсурдир, боиси у ташкилотга аъзо давлатларнинг деярли барчаси билан чегарадош. «Бироқ, 2015 йилдаёқ ариза киритганимизга қарамай, ҳали ҳам ШҲТга тўлақонли аъзо бўла олганимиз йўқ», — дея қўшимча қилди у.
Россия бош вазири Дмитрий Медведев ШҲТ мамлакатларига Афғонистон иқтисодиётини инқироздан олиб чиқиш бўйича аниқ лойиҳаларни ишлаб чиқишни таклиф қилди.
«Афғон иқтисодиётини инқироздан олиб чиқа оладиган, ушбу мамлакатнинг минтақадаги сиёсий ва иқтисодий жараёнлар иштирокчисига айлантира оладиган аниқ лойиҳалар ҳақида ўйлаш керак», — дея, Медведев бу йўлда ШҲТ мамлакатлари бундан кейин саъй-ҳаракатларни бирлаштиришлари кераклигини таъкидлади.
«Халқаро терроризм бутун цивилизациялашган дунёга таҳдид солмоқда. Экстремистик ғояларга қарши курашиш, террорчилик мафкурасига қарши тура олмоқ учун — айниқса бу борада ўзига яраша муаммоларга эга мамлакатларда — биз ҳуқуқни муҳофаза қилувчи органлар ва махсус хизматлар йўналишидаги яқин ҳамкорликни янада мустаҳкамлашимиз зарур», — дея қўшимча қилди Дмитрий Медведев.
Изоҳ (0)