Joriy yilning 30-oktabr kuni ijtimoiy tarmoqlarda Samarqand shahridagi “Hazora” mahallasida yetim bolani xo‘rlashganligi to‘g‘risida video tarqaldi. Mazkur video tarqalganidan so‘ng Samarqand shahri IIO FMB xodimlari tomonidan tezkor surishtiruv ishlari olib borildi.
Samarqand viloyat IIB matbuot xizmatining ma’lum qilishicha, holat yuzasidan olib borilgan dastlabki tergovoldi tekshiruv davomida Samarqand shahar Ziyokorlar ko‘chasida yashovchi 18 yoshli U.H. onasini nojo‘ya so‘zlar bilan haqorat qilib, gaplariga quloq solmasdan, alkogol va tamaki mahsulotlarini istemol qilishga ruju qo‘ygan. Shu sababli U.H.ning onasi qarindoshi 31 yoshli I.H.ga o‘g‘lini tarbiyalash va to‘g‘ri yo‘lga solib qo‘yishni so‘ragan.
Aniqlanishicha, mazkur video 2019-yilning avgust oyi o‘rtalarida olingan bo‘lib, I.H. qarindoshi U.H.ni Spitamen shohko‘chasida joylashgan temirchilik ustaxonasiga olib borib, u yerda ukasi 22 yoshli I.I. bilan birgalikda turli jismlar, ya’ni velosiped g‘ildiragining charmi va arqon bilan urib do‘pposlagan.
I.I. o‘zi bilan birgalikda ustaxonada ishlovchi 15 yoshli S.B.ga ushbu holatni videotasvirga olishni aytgan.
Mazkur videoni 2019-yilning oktabr oyida 36 yoshli F.K. videotasvirdagi qonunbuzarlarga nisbatan chora ko‘rilishi uchun Facebook ijtimoiy tarmog‘ida tarqatib yuborgan.
Ayni paytda mazkur holat yuzasidan Samarqand shahri IIO FMB Tergov bo‘limi tomonidan tergovga qadar surishtiruv ishlari olib borilmoqda.
Izoh (0)