Ijtimoiy tarmoqlarda “O‘zini Sirdaryoga tashlamoqchi bo‘lgan qiz qutqarib qolindi” sarlavhasi ostida yoritilgan xabar To‘raqo‘rg‘on tuman xalq ta’limi bo‘limi tomonidan batafsil o‘rganib chiqildi.
Mavzuga doir: Milliy gvardiya xodimlari Mingbuloq va Bo‘stonliqda ko‘prikdan sakramoqchi bo‘lgan 2 kishini qutqarib qoldi
Namangan viloyat xalq ta’limi boshqarmasi matbuot xizmatining yozishicha, xabarda bayon etilganidek To‘raqo‘rg‘on tumanidagi umumta’lim maktabida o‘quvchi qiz Mingbuloq tumanida yashovchi otasini ko‘rgani ketayotib, Sirdaryo ko‘prigi ustida to‘xtagan, ammo uning niyati o‘zini suvga tashlash bo‘lmagan.
Sirdaryo ko‘prigida xizmat faoliyatini olib borayotgan Milliy gvardiyaning viloyat qo‘riqlash boshqarmasi xodimlari undan so‘raganida ham shu haqda aytgan.
Shunga qaramay, milliy gvardiya xodimlari uni dastlab ichki ishlar bo‘limiga olib kelib, keyin u o‘qiydigan maktab direktori va o‘qituvchilar jamoasi bilan shu masalada yig‘ilish o‘tkazgan. Yig‘ilishda pedagog xodimlarga o‘quvchilar tomonidan o‘z joniga qasd qilish holatlarini oldini olish bo‘yicha tushunchalar berilgan.
Shuningdek, o‘quv yili davomida maktab psixologlari tomonidan suitsidga moyillikni aniqlovchi testlar olinganda test natijalariga ko‘ra bu o‘quvchida ham suitsidga moyillik kuzatilmagan.
Holat yuzasidan qizning o‘zi bilan suhbatlashilganda ham o‘z joniga qasd qilish niyati yo‘qligini ta’kidlagan.
Izoh (0)