Rasul Kusherbayev narxni majburan ushlab turish orqali aholini ijtimoiy himoyalab bo‘lmasligini bildirdi (video)

Oliy Majlis Qonunchilik palatasidagi O‘zLiDeP fraksiyasi a’zosi Rasul Kusherbayev narxni majburan ushlab turish orqali aholini ijtimoiy himoyalab bo‘lmasligini bildirdi.

Mamlakatimizda ijtimoiy himoyani kuchaytirish maqsadida narx-navoni erkinlashtirish masalasini qat’iy cheklash yoki bunga yo‘l qo‘yib bo‘lmaydi degan fikrlarni eshitdik. Shundan kelib chiqqan holda aytmoqchimizki, O‘zbekiston Liberal-demoktarik partiyasi o‘zining saylovoldi dasturida bozor iqtisodiyotiga o‘tishning to‘liq mexanizmlarini joriy qilish, jumladan, narxlarni taklif va talab asosida erkinlashtirish tarafdori sifatida siyosiy maydonga kirib kelyapti.

Partiyamiz talab va taklif asosida narxlar shakllanmasa, har qanday sohada sifat bo‘lmasligi, raqobat bo‘lmasligi va bu iqtisodiyotning turg‘unlashib qolishini ta’kidlaydi.

Biz narxlarni erkin ushlab turish natijasida kuchli manzilli ijtimoiy himoyaga erishib bo‘lmaydi deb hisoblaymiz. Shu bois buni boshqa analog resurslarini qidirish, shu jumladan, erkin bozor iqtisodiyoti sharoitida mamlakat iqtisodiyotini kuchaytirish va shuning asosida ma’lum bir moliyaviy resurslar orqali aniq manzilli ijtimoiy muhofazaga muhtoj aholi qatlamlarini himoya qilish, ularni har tomonlama qo‘llab-quvvatlashni amalga oshirish mumkin deb hisoblaydi.

Bozor iqtisodiyotida, erkinlashtirish, iqtisodiyotni liberallashtirish sharoitida narx-navoni majburiy tarzda davlat tomonidan boshqarish — faqatgina boqimandalikka, iqtisodiyotning turg‘unligiga, tadbirkorning rivojlanmasligiga olib keladi. Biz shu bois mazkur sohada mamlakatimizda olib borilayotgan islohotlarni ham qo‘llab-quvvatlaymiz.

Rasul Kusherbayev, Oliy Majlis Qonunchilik palatasidagi O‘zLiDeP fraksiyasi a’zosi