O‘zbekiston Xotin-qizlar qo‘mitasi Facebook ijtimoiy tarmog‘ida Akrom Mahmudov ismli foydalanuvchi o‘z sahifasi orqali ikki ayolning ichki ishlar xodimlari tomonidan nohaq 15 sutkaga qamalgani haqidagi iddaosi tasvirga tushirilgan videomurojaatga o‘z munosabatini bildirdi.
Ta’kidlanishicha, videomurojaat yo‘llagan ayollar Gavharoy Xamraqulova hamda uning qizi Gulira’no Xamraqulova Jalaquduq tumani Qatortol qishlog‘ida istiqomat qiladi.
2013-yilda Gavharoy Xamraqulovaning akasi Qobiljon Xamraqulov vafot etganidan buyon akasining turmush o‘rtog‘i, 1976-yilda tug‘ilgan Muqaddam Bakiyeva bilan uy-joy talashib keladi.
Gavharoy Xamraqulova Muqaddam Bakiyevani 2018-yilda odam o‘ldirishda ayblab, akasidan qolgan uyga egalik qilish maqsadida uning ustidan ichki ishlar idoralariga ariza yozgan. Ushbu ariza tuman IIB tomonidan ko‘rib chiqilgach, undagi faktlar tasdiqlanmaganligi hamda asossiz ekanligi sababli Gavharoy Xamraqulova Ma’muriy javobgarlik to‘g‘risidagi kodeksining 40-moddasi (“Tuhmat”) tartibida ma’muriy javobgarlikka tortilgan.
Shuningdek, 2019-yilning yanvar oyida to‘plangan hujjatlarga ko‘ra, Qo‘rg‘ontepa tumani prokuraturasi tomonidan unga nisbatan Jinoyat kodeksining 139-moddasi (“Tuhmat”) bilan jinoyat ishi qo‘zg‘atilgan.
“2019-yilning 27-may kuni Gavharoy Xamraqulova va uning qizi Gulira’no Xamroqulova birgalikda Xo‘jaobod tumanida viloyat hokimining quruvchilar bilan sayyor yig‘ilish o‘tkazishidan xabar topib, yuqorida ko‘rsatib o‘tilgan holat yuzasidan shikoyat qilmoqchi bo‘lib borgan. Sayyor qabul jarayonida tartib-intizomga amal qilmasdan, navbatsiz kirmoqchi bo‘lib, bu joyda xizmat olib borayotgan IIB xodimlarining viloyat rahbarining qabuliga navbat bilan kirish kerakligi to‘g‘risidagi ogohlantirishlariga qarata ularni uyatli so‘zlar bilan haqoratlagan”, — deyiladi xabarda.
Jamoat tartibini buzganligi uchun ushbu fuqarolarga nisbatan tegishli hujjatlar rasmiylashtirilib, ona-bola Xamraqulovalarga nisbatan Xo‘jaobod tumani Ma’muriy ishlar bo‘yicha sudi tomonidan Ma’muriy javobgarlik to‘g‘risidagi kodeksining 183-moddasi (“Mayda bezorilik”) va 194-moddasi (“Bo‘ysunmaslik”) tartibida sud jarayoni o‘tkazilgan ularning har biriga o‘n besh sutka muddatdan ma’muriy qamoq jazosi tayinlangan.
Izoh (0)