29-oktabr kuni O‘zbekistonni rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturida belgilangan Ijtimoiy sohani rivojlantirishning ustuvor yo‘nalishlarini amalga oshirish bo‘yicha Komissiya majlisi bo‘lib o‘tdi. Bu haqda Oliy Majlis Senati matbuot xizmati xabar berdi.
Majlisda Komissiya a’zolari, O‘zbekiston Prezidenti Administratsiyasi vakillari, Oliy Majlis Senati a’zolari, Qonunchilik palatasi deputatlari, mutasaddi vazirlik va idoralar rahbarlari, ommaviy axborot vositalari xodimlari qatnashdi. Unda Davlat dasturida belgilangan topshiriqlar ijrosini ta’minlash bo‘yicha 2019-yilning 9 oyi mobaynida amalga oshirilgan ishlar, istiqboldagi vazifalar va 2020-yildagi Davlat dasturiga kiritish uchun takliflar muhokama qilindi.
Ta’kidlanishicha, Davlat dasturining 221-bandida 1-iyulga qadar 2019/2020-o‘quv yilidan boshlab davlat buyurtmasi va tabaqalashtirilgan to‘lov-kontrakt tizimini bosqichma-bosqich joriy etish orqali oliy ta’lim muassasalarini o‘zini o‘zi moliyalashtirish tizimiga o‘tkazish, ularga moliyaviy masalalarda mustaqillik berish bo‘yicha normativ-huquqiy hujjat loyihasini ishlab chiqish belgilangan. Prezidentning 2019-yil 11-iyuldagi tegishli qarori bilan ta’lim maskanlarini yangi tizimga o‘tkazish tartibini tayyorlash muddati 2019-yil 1-oktabrga qadar uzaytirilgan. Biroq shunga qaramasdan, topshiriq ijrosi hamon ta’minlanmagan.
Davlat dasturining 231-bandida “Yoshlar — kelajagimiz” Davlat dasturi doirasida yoshlar tadbirkorligini rivojlantirish va bandligini ta’minlashga 2 trillion so‘m sarflanishi va 50 mingta yangi ish o‘rni yaratilishi qayd qilingan. 2019-yilning o‘tgan 9 oyi mobaynida 1 848 ta biznes-loyihaga jami 412 milliard so‘m ajratish orqali bor-yo‘g‘i 7 778 ta yangi ish o‘rni yaratilgan. Ijrosi uchun O‘zbekiston yoshlar ittifoqi, Bandlik va mehnat munosabatlari vazirligi, Moliya vazirligi, Investitsiyalar va tashqi savdo vazirligi, Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar hokimliklari mas’ul bo‘lgan ushbu muhim vazifa bajarilmay qolayotgani jiddiy izoh talab qilishi majlisda alohida ta’kidlandi.
Davlat dasturida belgilangan va ijrosi qoniqarsiz bo‘lgan vazifalar uchun mas’ul idoralar mutasaddilarining javoblari eshitildi.
2020-yil uchun aholi bandligini ta’minlash va yangi ish o‘rinlari tashkil etish davlat buyurtmasini ishlab chiqish, tegishli milliy professional standartlarni amaliyotga joriy etish lozimligi qayd etildi. Ushbu sohaning me’yoriy-huquqiy negizini mustahkamlash uchun bir qator yangi hujjatlar, shu jumladan “Mehnat migratsiyasi to‘g‘risida”gi O‘zbekiston qonuni loyihasini ishlab chiqish, “Xususiy bandlik agentligi to‘g‘risida”gi qonuni va boshqa normativ-huquqiy hujjatlarga o‘zgartirish kiritish zarurligi ta’kidlandi.
Majlisda ko‘rib chiqilgan boshqa masalalar yuzasidan ham Ijtimoiy sohani rivojlantirishning ustuvor yo‘nalishlarini amalga oshirish bo‘yicha Komissiyaning qarori qabul qilindi.
Izoh (0)