Расул Кушербаев нархни мажбуран ушлаб туриш орқали аҳолини ижтимоий ҳимоялаб бўлмаслигини билдирди (видео)

Олий Мажлис Қонунчилик палатасидаги ЎзЛиДеП фракцияси аъзоси Расул Кушербаев нархни мажбуран ушлаб туриш орқали аҳолини ижтимоий ҳимоялаб бўлмаслигини билдирди.

Мамлакатимизда ижтимоий ҳимояни кучайтириш мақсадида нарх-навони эркинлаштириш масаласини қатъий чеклаш ёки бунга йўл қўйиб бўлмайди деган фикрларни эшитдик. Шундан келиб чиққан ҳолда айтмоқчимизки, Ўзбекистон Либерал-демоктарик партияси ўзининг сайловолди дастурида бозор иқтисодиётига ўтишнинг тўлиқ механизмларини жорий қилиш, жумладан, нархларни таклиф ва талаб асосида эркинлаштириш тарафдори сифатида сиёсий майдонга кириб келяпти.

Партиямиз талаб ва таклиф асосида нархлар шаклланмаса, ҳар қандай соҳада сифат бўлмаслиги, рақобат бўлмаслиги ва бу иқтисодиётнинг турғунлашиб қолишини таъкидлайди.

Биз нархларни эркин ушлаб туриш натижасида кучли манзилли ижтимоий ҳимояга эришиб бўлмайди деб ҳисоблаймиз. Шу боис буни бошқа аналог ресурсларини қидириш, шу жумладан, эркин бозор иқтисодиёти шароитида мамлакат иқтисодиётини кучайтириш ва шунинг асосида маълум бир молиявий ресурслар орқали аниқ манзилли ижтимоий муҳофазага муҳтож аҳоли қатламларини ҳимоя қилиш, уларни ҳар томонлама қўллаб-қувватлашни амалга ошириш мумкин деб ҳисоблайди.

Бозор иқтисодиётида, эркинлаштириш, иқтисодиётни либераллаштириш шароитида нарх-навони мажбурий тарзда давлат томонидан бошқариш — фақатгина боқимандаликка, иқтисодиётнинг турғунлигига, тадбиркорнинг ривожланмаслигига олиб келади. Биз шу боис мазкур соҳада мамлакатимизда олиб борилаётган ислоҳотларни ҳам қўллаб-қувватлаймиз.

Расул Кушербаев, Олий Мажлис Қонунчилик палатасидаги ЎзЛиДеП фракцияси аъзоси