O‘zbekiston Milliy gvardiyasi xodimlari Namangan viloyati Mingbuloq tumanida ko‘prikdan o‘zini tashlamoqchi bo‘lgan o‘quvchi qizni hamda Toshkent viloyati Bo‘stonliq tumanida ko‘prikdan suvga o‘zini tashlagan yigitni qutqarib qoldi. Bu haqda Milliy gvardiya matbuot xizmati xabar berdi.
26-oktabr, shanba kuni soat 14:30 da Namangan viloyati Mingbuloq tumanidan oqib o‘tuvchi Sirdaryo daryosi ustidan o‘tgan ko‘prikda xizmat olib borayotgan O‘zbekiston Milliy gvardiyasi Namangan viloyati Qo‘riqlash boshqarmasi xodimlari ko‘prik ustida to‘xtagan maktab o‘quvchisini kuzatib turib, uning shubhali harakatlarini sezib qolgan va uning yoniga borib, suhbatga chaqirgan.
Suhbat chog‘ida o‘quvchi qiz maktabda yuz berayotgan ayrim holatlar sabab o‘zini suvga tashlamoqchi ekanligini ma’lum qilgan. O‘z o‘rnida Qo‘riqlash xizmati xodimlari o‘quvchining xatti-harakatlari noto‘g‘riligini ta’kidlab, zarur maslahatlar bergan.
Shundan so‘ng, ushbu o‘quvchi yashash joyiga olib borilib, ota-onasiga vaziyat tushuntirilgan holda topshirilgan.
28-oktabr, dushanba kuni esa soat taxminan 15:30 da Toshkent viloyati Bo‘stonliq tumanida xizmat olib borayotgan O‘zbekiston Milliy gvardiyasi Toshkent viloyati Qo‘riqlash boshqarmasi xodimlari ushbu hududda joylashgan Chorbog‘-1 ko‘prigida noma’lum erkak kishi ko‘prik o‘rtasiga borganida harakatdan to‘xtab, daryoga yuzlanganligining guvohi bo‘lgan.
Bu vaziyatdan shubhalangan xodimlar tezda fuqaro tomon harakatlanib to‘xtatishiga qaramay, fuqaro o‘zini ko‘prikdan suvga tashlagan.
Safdorlar I.Nosirov va B.Mirzaabdullayev zudlik bilan fuqaroni suvdan olib chiqib, unga birinchi tibbiy yordam ko‘rsatgan. Hozirda ushbu fuqaro Bo‘stonliq tumani Markaziy kasalxonasiga chap oyoq suyagi yopiq sinishi tashxisi bilan yotqizilgan.
Dastlabki surishtiruv ishlari davomida o‘zini suvga tashlagan shaxs Toshkent shahri Bektemir tumanida yashovchi 1999-yilda tug‘ilgan fuqaro G.R. ekanligi aniqlangan.
Izoh (0)