Davlat xavfsizlik xizmati Sirdaryo viloyati boshqarmasi xodimlari tomonidan o‘tkazilgan tezkor tadbir natijasida qo‘shni Tojikistondan O‘zbekiston orqali Qozog‘istonga olib o‘tilayotgan ko‘p miqdordagi giyohvand modda ushlab qolindi. Bu haqda O‘zA xabar berdi.
Aniqlanishicha, Soyib ismli Tojikiston fuqarosi giyohvand moddani kontrabanda yo‘li bilan O‘zbekistonga olib kirgan va Toshkent shahrida yashovchi, muqaddam sudlangan Shuhrat Asqaraliyev xonadoniga olib borgan.
Ushbu giyohvand moddalarni O‘zbekiston orqali tranzit sifatida o‘tkazish ishlarining tashkilotchisi bo‘lgan Qozog‘iston fuqarosi, Turkiston viloyatida istiqomat qiluvchi Elyor Jo‘rayev Shuhrat Asqaraliyev xonadoniga kelib, giyohvand moddalarni qabul qilib olgan.
Tezkor xodimlar tomonidan ko‘rilgan chora-tadbirlar natijasida Elyor Jo‘rayev og‘uni Sirdaryo viloyatiga olib borib, aylanma yo‘llar orqali Qozog‘istonga olib chiqib ketmoqchi bo‘lgan paytida qo‘lga olingan.
Ekspertiza xulosasiga ko‘ra, Elyor Jo‘rayevdan ashyoviy dalil sifatida olingan giyohvand modda geroin bo‘lib, jami og‘irligi 20 kilogramm 32 grammni tashkil etgan.
Mutaxassislarning fikricha, bugungi kunda 20 kg geroin moddasining narxi 300 ming dollardan ortiq mablag‘ni tashkil qiladi.
Hozirda ushbu holat yuzasidan DXX Sirdaryo viloyati boshqarmasi tomonidan Jinoyat Kodeksining 246 va 273-moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)