Avvalroq, Sog‘liqni saqlash vazirligi “Navoiyazot”ga tegishli PVX zavodida 4 kishi noma’lum gazdan zaharlanib kasalxonaga yotqizilgani haqida xabar bergandi. “O‘zkimyosanoat” AJ matbuot xizmati ushbu xabarga o‘z munosabatini bildirib, xabar assosiz ekanligini ma’lum qildi.
“28-oktabr kuni PVX zavodi va umuman ‘Navoiyazot’ AJ hududida hech qanday favqulodda holat yuz bermagan. Shu kuni soat 17:00 lar atrofida ‘Navoiyazot’ AJ Tibbiy sanitariya qismiga ‘Navoiyazot’ AJ hududidagi ‘PVX, kaustik soda va metanol ishlab chiqarish majmuasi’ qurilishida ishtirok etayotgan 4 nafar xodim o‘zlarini yomon his etganliklari tufayli shaxsan murojaat etgan”, — deyiladi xabarda.
“Navoiyazot” AJ Tibbiy sanitariya qismi tibbiyot xodimlari tomonidan tibbiy ko‘rik vaqtida ularning organizmida hech qanday kimyoviy moddalardan zaharlanish alomatlari aniqlanmaganligi tufayli ovqatdan zaharlanish taxmini bilan Navoiy shahar yuqumli kasalliklar shifoxonasiga “Navoiyazot” AJ xizmat avtomobilida olib borilgan. U yerdagi ko‘rikdan so‘ng bir nafar xodimga shu kunning o‘zida javob berilgan, qolgan 3 nafar murojaat etgan xodimlar Respublika shoshilinch tez tibbiy yordam ilmiy markazining Navoiy viloyat filiali toksikologiya bo‘limida olib qolingan va 29-oktabr kuni soat 10:00 da ahvoli yaxshiligi tufayli shifoxonadan chiqarilgan.
Ta’kidlanishicha, ayni vaqtda ushbu xodimlar o‘z xizmat vazifasini bajarmoqda.
“Xabarda keltirilgan hamda tekshirilmagan ba’zi ma’lumotlarga oydinlik kiritishni lozim deb hisoblaymiz. Shuningdek, tibbiyotda ‘Noma’lum kuydiruvchi gazdan’ zaharlanish tashxisi haqida ma’lumot mavjud emasligini ma’lum qilamiz”, — deyiladi “O‘zkimyosanoat” AJ matbuot xizmatining munosabatida.
Izoh (0)