Ўзбекистон Миллий гвардияси ходимлари Наманган вилояти Мингбулоқ туманида кўприкдан ўзини ташламоқчи бўлган ўқувчи қизни ҳамда Тошкент вилояти Бўстонлиқ туманида кўприкдан сувга ўзини ташлаган йигитни қутқариб қолди. Бу ҳақда Миллий гвардия матбуот хизмати хабар берди.
26 октябрь, шанба куни соат 14:30 да Наманган вилояти Мингбулоқ туманидан оқиб ўтувчи Сирдарё дарёси устидан ўтган кўприкда хизмат олиб бораётган Ўзбекистон Миллий гвардияси Наманган вилояти Қўриқлаш бошқармаси ходимлари кўприк устида тўхтаган мактаб ўқувчисини кузатиб туриб, унинг шубҳали ҳаракатларини сезиб қолган ва унинг ёнига бориб, суҳбатга чақирган.
Суҳбат чоғида ўқувчи қиз мактабда юз бераётган айрим ҳолатлар сабаб ўзини сувга ташламоқчи эканлигини маълум қилган. Ўз ўрнида Қўриқлаш хизмати ходимлари ўқувчининг хатти-ҳаракатлари нотўғрилигини таъкидлаб, зарур маслаҳатлар берган.
Шундан сўнг, ушбу ўқувчи яшаш жойига олиб борилиб, ота-онасига вазият тушунтирилган ҳолда топширилган.
28 октябрь, душанба куни эса соат тахминан 15:30 да Тошкент вилояти Бўстонлиқ туманида хизмат олиб бораётган Ўзбекистон Миллий гвардияси Тошкент вилояти Қўриқлаш бошқармаси ходимлари ушбу ҳудудда жойлашган Чорбоғ-1 кўпригида номаълум эркак киши кўприк ўртасига борганида ҳаракатдан тўхтаб, дарёга юзланганлигининг гувоҳи бўлган.
Бу вазиятдан шубҳаланган ходимлар тезда фуқаро томон ҳаракатланиб тўхтатишига қарамай, фуқаро ўзини кўприкдан сувга ташлаган.
Сафдорлар И.Носиров ва Б.Мирзаабдуллаев зудлик билан фуқарони сувдан олиб чиқиб, унга биринчи тиббий ёрдам кўрсатган. Ҳозирда ушбу фуқаро Бўстонлиқ тумани Марказий касалхонасига чап оёқ суяги ёпиқ синиши ташхиси билан ётқизилган.
Дастлабки суриштирув ишлари давомида ўзини сувга ташлаган шахс Тошкент шаҳри Бектемир туманида яшовчи 1999 йилда туғилган фуқаро Г.Р. эканлиги аниқланган.
Изоҳ (0)