O‘zbekiston Prezidenti “Ilm-fan va ilmiy faoliyat to‘g‘risida”gi qonunni imzoladi. Bu haqda Adliya vazirligi xabar berdi.
Qonunga muvofiq, ilm-fan va ilmiy faoliyat sohasining asosiy yo‘nalishlaridan biri ilm-fan va ilmiy faoliyatni rivojlantirish orqali milliy iqtisodiyot raqobatbardoshligi hamda samaradorligiga erishishdan iborat.
Qonun bilan qator tashkilotlarning ilm-fan va ilmiy faoliyat sohasidagi vakolatlari belgilab berildi.
Xususan, Innovatsion rivojlanish vazirligi ilm-fan va ilmiy faoliyat sohasidagi vakolatli davlat organi hisoblanadi hamda sohani rivojlantirish masalalari bo‘yicha tegishli tashkilotlarning faoliyatini muvofiqlashtiradi.
Shuningdek, qonunga ko‘ra, ta’lim tashkilotida iste’dodlarni aniqlash, tanlash, tarbiyalash bo‘yicha tegishli chora-tadbirlar olib borish orqali yoshlar ilm-fan va ilmiy faoliyatga jalb etiladi.
Ilmiy faoliyat yurituvchi shaxslar bir qator majburiyatlarga ega. Xususan,
- inson hayoti va salomatligi, atrof tabiiy muhitga zarar yetkazmaslik;
- ko‘chirmachilikka yo‘l qo‘ymaslik, o‘zgalarning ilmiy ishlanmalarini o‘zlashtirmaslik va yolg‘on ma’lumotlarga asoslanmaslik;
- intellektual mulk huquqlari va ilmiy odob-axloq qoidalariga rioya qilish.
Qonun rasmiy e’lon qilingan kundan e’tiboran kuchga kiradi.
Qonundagi ilmiy faoliyat yurituvchilar uchun mehnat ta’tili nazarda tutilgan qoidalar 2020-yil 1-yanvardan e’tiboran amalga kiritiladi.
Izoh (0)