O‘zbekistonda aholi bandligini ta’minlash uchun ajratilgan mablag‘larning maqsadli sarflanishida qonun buzilishi holatlari aniqlandi. Bu haqda Moliya vazirligi matbuot xizmati xabar berdi.
Xabarda aytilishicha, band bo‘lmagan aholini, ayniqsa, yoshlarni ish bilan ta’minlash borasida O‘zbekiston Respublikasi Prezidentining 2017-yil 24-mayda “Bandlik sohasida davlat siyosatini yanada takomillashtirish va mehnat organlari faoliyati samaradorligini tubdan oshirish chora-tadbirlari to‘g‘risida”gi PF-5052 sonli Farmoni qabul qilingan.
Farmon talablaridan kelib chiqib, vaqtinchalik band bo‘lmagan aholining yo‘l va uy-joy kommunal infratuzilmasi obyektlarini qurishda, ta’mirlash va rekonstruksiya qilishda, shahar va tumanlarni obodonlashtirishda ishtirok etishini moliyalashtirib borish maqsadida Jamoat ishlari jamg‘armasi tashkil etilgan.
Joriy yilning yanvar-sentabr oylarida jamoat ishlariga 284 ming nafar fuqarolar jalb etilgan bo‘lib, ularga Jamg‘arma hisobidan 189,4 milliard so‘m ish haqi to‘lab berilgan.
Moliya vazirligining Davlat moliyaviy nazorati departamenti tomonidan Jamoat ishlari jamg‘armasi mablag‘larini maqsadli sarflanishi yuzasidan o‘tkazilgan nazorat tadbirlarida 4,7 milliard so‘m, shundan joriy yilning 3-choragida 1,3 milliard so‘m Jamg‘arma mablag‘larini asossiz va noqonuniy sarflanish holatlari aniqlandi.
Jamg‘arma mablag‘larini maqsadli sarflanishiga mas’ul bo‘lgan tashkilot xodimlari tomonidan o‘z xizmat vazifalarini bajarishda qonunni buzish holatlariga yo‘l qo‘yish holatlari aniqlangan.
Andijon shahar Bandlikka ko‘maklashish markazi bosh hisobchisi “Elga xizmat ko‘makdosh” MChJ rahbari bilan kelishgan holda jamoat ishlarini bajarganlik to‘g‘risida hech qanday hujjatlarsiz 362,8 million so‘m mablag‘ni MChJ hisob raqamiga o‘tkazib bergan.
Baliqchi tumani Bandlikka ko‘maklashish markazi bosh inspektori tumandagi 8 ta mahalla fuqarolar yig‘inlari xodimlari bilan kelishgan holda 44 nafar fuqarolar bilan tuzilgan soxta mehnat shartnomalari va jamoat ishlarini bajarilganligi to‘g‘risida hisobot ma’lumotlari asosida 52,4 million so‘m o‘zlashtirilgan.
Bulung‘ur tumanidagi “Agro farovon zamin” agrofirmasi rahbari agrofirmada ishlab kelayotgan 36 nafar xodimlarni (xodimlarning bexabarligida) 2019-yil 22-mayda ishdan bo‘shatib, uch oy muddatga haq to‘lanadigan jamoat ishlariga soxta buyurtmani tuman Bandlikka ko‘maklashish markaziga taqdim etib, 27,4 million so‘m Jamg‘armadan asossiz olganligi aniqlandi.
Shuningdek, Buxoro tumandagi 4 ta fermer xo‘jaliklariga xizmat ko‘rsatuvchi hisobchi tomonidan fermer xo‘jaliklarida ishlamagan 8 nafar fuqarolar nomidan hujjatlarni rasmiylashtirib, tuman Bandlikka ko‘maklashish markaziga taqdim etish orqali 12 million so‘m mablag‘larni o‘zlashtirgan.
Angor tumanidagi “Angor agro pilla” MChJ tomonidan haq to‘lanadigan jamoat ishiga jalb qilinganlik to‘g‘risida 37 nafar fuqarolar nomiga soxta hujjatlar rasmiylashtirilib, Angor tumani Bandlikka ko‘maklashish markaziga taqdim etib, jamg‘armaning 65 million so‘m mablag‘lari o‘zlashtirib yuborilgan.
Sherobod tumanidagi “Xo‘jaqiya-1” MFY raisi jamoatchilik ishida ishlamagan uch nafar hamda jamoatchilik ishlariga jalb etilib, keyinchalik bo‘shab ketgan 5 nafar fuqarolar nomiga soxta hujjatlarni rasmiylashtirib, tuman Bandlikka ko‘maklashish markaziga taqdim etish orqali 18,4 million so‘m mablag‘larni o‘zlashtirgan.
Bag‘dod tumanda o‘tkazilgan nazorat tadbirlarida “Universal biznes invest” MChJ va yana 23 ta korxona, fermer xo‘jaliklarida 106 nafar fuqarolar nomiga hujjatlarni soxtalashtirish yo‘li bilan 103 million so‘m jamg‘arma mablag‘lari o‘zlashtirilganligi aniqlangan.
Qayd etilishicha, yuqoridagi holatlar bo‘yicha nazorat tadbirlari hujjatlari tegishli choralar ko‘rish uchun prokuratura organlariga yuborildi.
Izoh (0)