Namanganda ilk mobil bog‘cha o‘z faoliyatini boshladi. Bu haqda “Daryo” muxbiri Azizbek Abduvaliyev xabar bermoqda.
Mazkur loyiha viloyatning Yangiqo‘rg‘on tumanida amalga oshirildi. Buning uchun Isuzu avtobusi maktabgacha ta’lim tashkiloti xonasi ko‘rinishiga keltirildi. Tomiga quyosh panellari o‘rnatilib, ichi o‘yinchoqlar va o‘quv qurollari bilan jihozlandi. “Aqlvoy” deb nomlangan mobil bog‘cha yordamida chekka hududlarga borib, bolalarga ta’lim-tarbiya beriladi.
Loyihaga muvofiq, tumanning uchta mahallasida 9 ta mobil guruh tashkil etildi. Har bir guruhga 16 nafar maktabgacha yoshdagi o‘g‘il-qiz jalb qilinib, jami 144 nafar bola qamrab olinishi rejalashtirilgan.
“Qandiyon” mahallasida maktab hududidan, “Rovot” va “Mo‘g‘ol” mahallalarida esa bo‘sh turgan joylarda ikki sotixdan yer ajratilib, bolalarga ta’lim berish va o‘yinlar tashkil qilish uchun zarur vositalar ajratilgan maydonchalar tashkil etildi.
Endi maxsus jihozlangan avtobusda tarbiyachi, tarbiyachi yordamchisi va haydovchidan iborat mobil guruh har bir mahallaga haftasiga ikki kun borib, bolalar bilan to‘rt soat davomida mashg‘ulot o‘tadi.
Mobil bog‘cha mashg‘ulotlari bepul amalga oshiriladi.
Ma’lumot uchun, Namangan viloyatida bugungi kunda 1000 dan ortiq maktabgacha ta’lim tashkiloti bo‘lib, ularning deyarli yarmi nodavlat bog‘chalari hisoblanadi. MTTlarga bolalar qamrovi esa ikki yil davomida 24 foizdan 47,9 foizga yetdi.
Izoh (0)