Наманганда илк мобил боғча ўз фаолиятини бошлади. Бу ҳақда «Дарё» мухбири Азизбек Абдувалиев хабар бермоқда.
Мазкур лойиҳа вилоятнинг Янгиқўрғон туманида амалга оширилди. Бунинг учун Isuzu автобуси мактабгача таълим ташкилоти хонаси кўринишига келтирилди. Томига қуёш панеллари ўрнатилиб, ичи ўйинчоқлар ва ўқув қуроллари билан жиҳозланди. «Ақлвой» деб номланган мобил боғча ёрдамида чекка ҳудудларга бориб, болаларга таълим-тарбия берилади.
Лойиҳага мувофиқ, туманнинг учта маҳалласида 9 та мобил гуруҳ ташкил этилди. Ҳар бир гуруҳга 16 нафар мактабгача ёшдаги ўғил-қиз жалб қилиниб, жами 144 нафар бола қамраб олиниши режалаштирилган.
«Қандиён» маҳалласида мактаб ҳудудидан, «Ровот» ва «Мўғол» маҳаллаларида эса бўш турган жойларда икки сотихдан ер ажратилиб, болаларга таълим бериш ва ўйинлар ташкил қилиш учун зарур воситалар ажратилган майдончалар ташкил этилди.
Энди махсус жиҳозланган автобусда тарбиячи, тарбиячи ёрдамчиси ва ҳайдовчидан иборат мобил гуруҳ ҳар бир маҳаллага ҳафтасига икки кун бориб, болалар билан тўрт соат давомида машғулот ўтади.
Мобил боғча машғулотлари бепул амалга оширилади.
Маълумот учун, Наманган вилоятида бугунги кунда 1000 дан ортиқ мактабгача таълим ташкилоти бўлиб, уларнинг деярли ярми нодавлат боғчалари ҳисобланади. МТТларга болалар қамрови эса икки йил давомида 24 фоиздан 47,9 фоизга етди.
Изоҳ (0)