“Navoiyazot”ga tegishli PVX zavodida 4 kishi noma’lum gazdan zaharlanib kasalxonaga yotqizildi

28-oktabr kuni taxminan soat 16:00 da Navoiy viloyati “Navoiyazot” AJga qarashli PVX zavodida noma’lum kuydiruvchi gazdan ingalyatsion zaharlanish yuz berdi. Bu haqda Sog‘liqni saqlash vazirligi jamoatchilik bilan aloqalar bo‘limi xabar berdi.

Mazkur holat yuzasidan tez tibbiy yordam brigadasi voqea joyiga zudlik bilan yetib borgan. Favqulodda vaziyatda jarohatlangan 4 nafar bemor Respublika shoshilinch tez tibbiy yordam ilmiy markazi Toksikologiya bo‘limiga yotqizilgan.

“Tajribali shifokorlar tomonidan bemorlarning ahvoli baholanib, ularga zamonaviy davolash standartlari bo‘yicha malakali tibbiy yordam ko‘rsatilmoqda.

Mazkur holat Sog‘liqni saqlash vazirligi tomonidan qat’iy nazoratga olingan bo‘lib, bemorlarning ahvoli yuzasidan qo‘shimcha ma’lumot beriladi”, — deyiladi xabarda.