O‘zbekiston va Xitoy ishbilarmon doiralari uchun viza jarayonlarini soddalashtirish to‘g‘risidagi bitim kuchga kirdi

26-sentabr kuni O‘zbekiston va Xitoy hukumatlari o‘rtasida ishbilarmon doiralar vakillari uchun viza jarayonlarini soddalashtirish to‘g‘risida 27-avgustda Pekin shahrida imzolangan bitim kuchga kirdi. Bu haqda Tashqi ishlar vazirligi xabar berdi.

Bitimga ko‘ra har bir tomon 5 ish kuni ichida muddati 6 oygacha bo‘lgan ko‘p martalik ishbilarmonlik vizasi berishga majbur.

O‘zbekiston fuqarolari Xitoyning ishbilarmonlik vizasini rasmiylashtirish uchun mazkur mamlakatning Toshkent shahridagi elchixonasiga quyidagi hujjatlarni taqdim etishlari zarur:

Asosiy hujjatlar:

• Pasportning asl nusxasi, pasportning ma’lumotlar bor sahifasi nusxasi;
• Viza rasmiylashtirish uchun anketa va rasm.

Qo‘shimcha hujjatlar:

• Xitoyning vakolatli tashkilotidan rasmiy taklifnoma yoki Xitoyga taklif qilayotgan tomon yordamida olingan mazkur taklifnomaning tasdig‘i (shtrix kod bilan).

3-bandda ko‘rsatilgan hujjatlarni taqdim qilish imkoni bo‘lmaganda, quyidagi hujjatlar taqdim qilinadi:

• davlat hokimiyati tegishli organlari, jumladan, O‘zbekiston davlat va xo‘jalik boshqaruvi organlari (www.gov.uz) va banklarining rasmiy xati hamda Xitoy tomonidan taklif qiluvchining odatiy taklifnomasi;

yoki

• O‘zbekiston Savdo-sanoat palatasining (SSP) kafolat xati, SSPga a’zolik to‘g‘risidagi guvohnoma, kompaniya yoki yakka tartibdagi tadbirkorning litsenziyasi, arizachining ish joyidan ma’lumotnoma taklif qilayotgan Xitoy kompaniyasining litsenziyasi ilova qilingan odatiy taklifnoma.

Xitoyning Toshkent shahridagi elchixonasi konsullik bo‘limiga quyidagi telefon raqami orqali murojaat qilib, batafsil ma’lumot olish mumkin: +998(71) 233-47-28.

Ishbilarmon doira vakillari – Xitoy fuqarolariga ko‘p martalik ishbilarmonlik vizasini rasmiylashtirish uchun taklif qilayotgan tomon O‘zbekiston Tashqi ishlar vazirligiga quyidagi hujjatlarni taqdim qilishi shart:

Asosiy hujjatlar:

1. Taklif qilayotgan tashkilotning rasmiy blankida chop etilgan o‘rnatilgan tartibdagi viza arizasi;
2. Evisa.mfa.uz saytida to‘ldirilgan elektron viza anketasi;
3. Taklif qilinayotgan kishining shaxsni tasdiqlovshi hujjati nusxasi (milliy pasport yoki uning o‘rnini bosuvchi, xorijga chiqqan paytda ishlatiladigan hujjat).

Qo‘shimcha hujjatlar:

4. Taklif qilinayotgan shaxsning ish joyidan ma’lumotnoma (davlat tili yoki rus tiliga tarjimasi bilan).

O‘zbekiston Tashqi ishlar vazirligining Konsullik-huquqiy departamentiga +998(71) 236-27-07 yoki +998(71) 233-73-40 raqamlari orqali qo‘ng‘iroq qilib, batafsil ma’lumot olish mumkin.