Tibbiy-ilmiy faoliyat bilan shug‘ullanuvchilarning Tabobat akademiyasi shifokorlarni himoya qilishda davlat organlariga ko‘mak ko‘rsatish istagini bildirdi. Bu haqda akademiya raisi, professor Ibrohimjon Asqarov muassasaning kengaytirilgan yig‘ilishida aytib o‘tdi, deya xabar bermoqda “Daryo” muxbiri Musulmonbek Ibrohimov.
Professor Asqarovning ta’kidlashicha, bugungi kunda tibbiyot xodimlariga bo‘layotgan tazyiq va zo‘ravonliklarning oldi o‘z vaqtida olinmasa, kelgusida boshqa soha vakillari ham shunday tajovuzlar ostida qolishi mumkinligini istisno qilib bo‘lmaydi.
“Shifokorlarga bo‘layotgan zo‘ravonliklarni hammamiz ko‘rib, bilib turibmiz. Ming afsuski, bunday noma’qul ishlar kundan-kunga ortib bormoqda. ‘Doring yo‘q, ukolni undoq qilding, kech kelding‘, deb shifokorlarni urayotganlar ertaga boshqa soha vakillariga ham zug‘um qilishi mumkin. Buning oldini olish maqsadida, Tabobat akademiyasi tibbiy-ilmiy faoliyat bilan shug‘ullanuvchilarni qonuniy himoya qilishda mutasaddi idoralarga ko‘maklashadi. Shu bilan birga, aholi o‘rtasida tushuntirish ishlarini olib boradi va tajovuz qilingan holatlar bo‘yicha jamoatchilik o‘rganishini o‘tkazib, o‘rganish ma’lumotlarini vakolatli organlarga taqdim etadi”, – dedi Ibrohimjon Asqarov.
“Deylik, O‘zbekistonning biror bir hududida shifokorga nisbatan tazyiq bo‘ldi — biz zudlik bilan voqea joyiga akademiyamiz vakilini jo‘natamiz. Masala tez fursatda o‘rganilib, kerakli hujjatlar yig‘iladi va vakolatli organlarga taqdim etiladi. Murojaatni ko‘rib chiqish yakunlari va qabul qilingan qaror bo‘yicha belgilangan tartibda jamoatchilik nazorati o‘rnatiladi”, — deydi Tabobat akademiyasi raisi.
Professorning qo‘shimcha qilishicha, tibbiyot xodimlarining ish faoliyatiga to‘sqinlik qilib, ularni kaltaklagan shaxslar faqat jarima bilan qutulib qolishi to‘g‘ri emas. Shu bois akademiya bunday holatlarda javobgarlikni og‘irlashtirish bo‘yicha Sog‘liqni saqlash vazirligi tomonidan kiritilgan normativ-huquqiy hujjat loyihasini to‘la qo‘llab-quvvatlaydi.
Ma’lumotlarga ko‘ra, O‘zbekistonda 2017—2018-yillar davomida tibbiyot xodimlariga 400 dan ortiq tajovuzlar qilingan. Faqat 40 ta holatda tibbiyot xodimlari ularga tajovuz qilgan shaxslar ustidan huquqni muhofaza qiluvchi idoralarga murojaat qilgan. O‘zbekistondagi amaldagi qonunchilikda o‘z vazifasini bajarayotgan tibbiyot xodimlarini bemorlar va ularning yaqin qarindoshlarining hujumidan himoya qiluvchi maxsus normalar mavjud emas.
2019-yil oktabrida Oliy Majlis Qonunchilik palatasida “Tibbiy xizmat ko‘rsatish bilan bog‘liq kasbiy faoliyatini amalga oshirayotgan tibbiyot xodimlarini himoya qilish maqsadida O‘zbekiston Respublikasining ayrim qonun hujjatlariga qo‘shimcha va o‘zgartishlar kiritish to‘g‘risida”gi qonun loyihasi ko‘rib chiqilgani ma’lum bo‘lgandi. Qonun shifokorlarga tajovuz qilgan shaxslarga nisbatan ma’muriy va jinoiy javobgarlikni kuchaytirishni nazarda tutadi.
Izoh (0)