O‘zbekistonga kirish vizalari tizimlashtirildi

Vazirlar Mahkamasining 2019-yil 21-oktabrdagi 885-son qaroriga asosan O‘zbekston Respublikasiga kirish vizalari tizimlashtirilib, bitta umumiy ro‘yxatga birlashtirildi. Bu haqda Norma xabar berdi.

Ro‘yxatdan quyidagi 28 ta viza turi joy olgan.

Diplomatik kirish vizasi — doimiy akkreditatsiya qilinganlar uchun (D-1), vaqtincha turganlar uchun (D-2), diplomatik pasport egalari uchun turistik (DT);

Xizmat kirish vizasi — doimiy akkreditatsiya qilinganlar uchun (S-1), vaqtincha (S-2), O‘zbekiston davlat tashkilotlarining taklifi bo‘yicha (S-3);

Rasmiy kirish vizasi — rasmiy va davlat tashriflari doirasida (O);

Ishbilarmonlik kirish vizasi — O‘zbekistonning profil muassasalari va idoralarida akkreditatsiya qilinganlar uchun (B-1) va biznes viza (B-2);

Turistik (T) va guruhli turistik kirish vizasi (TG);

Ziyorat kirish vizasi — Din ishlari bo‘yicha qo‘mitaning so‘roviga asoasn O‘zbekistonning madaniy-tarixiy va diniy-ma’naviy merosini o‘rganish uchun (PLG):

Ishchi kirish vizasi — Tashqi mehnat migratsiyasi agentligi litsenziyasi asosida (E);

Matbuot vakillari uchun kirish vizasi — O‘zbekiston TIVda doimiy akkreditatsiya qilingan (J-1), “Dunyo” AAda vaqtincha akkreditatsiya qilinganlar (J-2);

Mehmon kirish vizasi — IIVning Migratsiya va fuqarolikni rasmiylashtirish bosh boshqarmasi orqali O‘zbekiston fuqarolarining taklifi bo‘yicha (PV-1), xorijiy fuqarolarning taklifi bo‘yicha (PV-2);

Vatandoshlar uchun kirish vizasi — O‘zbekiston Respublikasida tug‘ilganlar va ularning oila a’zolari uchun O‘zbekiston fuqarosi bo‘lgan va uning hududida doimiy yashaydigan fuqarolar taklifiga binoan 2 yilgacha muddatga (VYD):

Talabalar kirish vizasi — O‘zbekiston hududida joylashgan oliy ta’lim muassasalarida qisqa muddatda ta’lim oluvchi xorijiy talablarga 1 yilgacha muddatga (STD):

O‘quv — doimiy asosda ta’lim davriga (A-1) va o‘qituvchilar kirish vizasi — O‘zbekistonda doimiy asosda ishga joylashishda (A-2), akademik kirish vizasi — O‘zbekistonda ilmiy-tadqiqot ishlarini amalga oshirish uchun (A3);

Tibbiy kirish vizasi — Davolanish-profilaktika muassasalari taklifiga binoan O‘zbekistonda davolanish uchun (MED):

Ekipaj (C-1) va haydovchilar (C-2) uchun kirish vizasi;

Chiqish (EXIT) va tranzit (TRAN) vizasi:

Ko‘p martalik investitsiya vizasi — O‘zbekistonga investitsiya kiritadigan investorlar uchun (INV).

Bundan tashqari, fuqarolari uchun O‘zbekistonda vizasiz rejim joriy qilingan mamlakatlarning yagona ro‘yxati alohida tuzilgan. Bunday mamlakatlar soni 86 ta bo‘lib, bunda ayrim mamlakatlar uchun vizasiz rejim 2020-yil 1-yanvardan amal qilishni boshlaydi.

Bu mamlakatlar qatoridan quyidagilar o‘rin olgan:

Cheklanmagan muddatga

Ozarbayjon, Gruziya, Armaniston, Belarus, Qozog‘iston, Moldova, Rossiya, Ukraina.

60 kungacha

Qirg‘iziston.

30 kungacha

Avstraliya, Avstriya, Argentina, Bosniya va Gersegovina, Vatikan, Lyuksemburg, Vengriya, Bruney-Dorussalom, Isroil, Gretsiya, Irlandiya, Islandiya, Italiya, Kanada, Andorra, Lixtenshteyn, Monako, Belgiya, Daniya, Ispaniya, Niderlandiya, Norvegiya, Shvetsiya, Latviya, Litva, Malayziya, Mo‘g‘uliston, Yangi Zelandiya, BAA, Portugaliya, Bolgariya, Indoneziya, Kipr, Janubiy Koreya, Malta, Polsha, San-Marino, Serbiya, Sloveniya, Tojikiston, Xorvatiya, Chili, Ruminiya, Singapur, Slovakiya, Buyuk Britaniya, Turkiya, Braziliya, Germaniya, Finlyandiya, Fransiya, Chernogoriya, Chexiya, Shveysariya, Estoniya, Yaponiya.

2020-yil 1-yanvardan boshlab — Antigua va Barbuda, Barbados, Beliz, Grenada, Dominikan, Meksika, Gvatemala, Gonduras, Kosta-Rika, Kuba, Nikaragua, Panama, Trinidad va Tobago, El-Salvador, Sent-Vinsent va Grenadin, Sent-Lyusiya, Bagama Orollari, Dominika, Sent-Kits va Nevis, Yamayka.

7 kundan ko‘p bo‘lmagan muddatga

Xitoy, shu jumladan, Gonkong — 2020-yil 1-yanvardan va qaytuvchi aviachipta mavjud bo‘lganda.

Vizasiz rejim yuqorida sanab o‘tilgan mamlakatlarning fuqarolariga, ularning safar maqsadlaridan qat’i nazar O‘zbekistonga tashrif buyurishni rejalashtirayotgan barcha toifadagi pasport egalariga nisbatan qo‘llaniladi. Mamlakatga kirish uchun shaxs amaldagi milliy pasport yoki xorijiy mamlakatlarga safar vaqtida qo‘llaniladigan, uning o‘rniga o‘tadigan, amal qilish muddati vizani rasmiylashtirish sanasidan kamida 6 oydan keyin tugaydigan boshqa hujjatga ega bo‘lishi kerak. Vizasiz rejim ko‘rsatib o‘tilgan mamlakatlar hududida doimiy yashaydigan, fuqaroligi bo‘lmagan shaxslarga nisbatan qo‘llanilmaydi.

30 kunlik va 60 kunlik vizasiz rejim davlat chegarasi kesib o‘tilgan vaqtdan boshlab amalga kiradi va uning tugashiga qadar xorijiy fuqaro respublikadan chiqib ketishi kerak. Mamlakatda 30 yoki 60 kundan ko‘p bo‘lish zarurati tug‘ilganda, xorijiy fuqaro kirish vizalari toifalarining birini rasmiylashtirish uchun zarur hujjatlarni topshirishi kerak.