Ўзбекистон ва Хитой ишбилармон доиралари учун виза жараёнларини соддалаштириш тўғрисидаги битим кучга кирди

26 сентябрь куни Ўзбекистон ва Хитой ҳукуматлари ўртасида ишбилармон доиралар вакиллари учун виза жараёнларини соддалаштириш тўғрисида 27 августда Пекин шаҳрида имзоланган битим кучга кирди. Бу ҳақда Ташқи ишлар вазирлиги хабар берди.

Битимга кўра ҳар бир томон 5 иш куни ичида муддати 6 ойгача бўлган кўп марталик ишбилармонлик визаси беришга мажбур.

Ўзбекистон фуқаролари Хитойнинг ишбилармонлик визасини расмийлаштириш учун мазкур мамлакатнинг Тошкент шаҳридаги элчихонасига қуйидаги ҳужжатларни тақдим этишлари зарур:

Асосий ҳужжатлар:

• Паспортнинг асл нусхаси, паспортнинг маълумотлар бор саҳифаси нусхаси;
• Виза расмийлаштириш учун анкета ва расм.

Қўшимча ҳужжатлар:

• Хитойнинг ваколатли ташкилотидан расмий таклифнома ёки Хитойга таклиф қилаётган томон ёрдамида олинган мазкур таклифноманинг тасдиғи (штрих код билан).

3-бандда кўрсатилган ҳужжатларни тақдим қилиш имкони бўлмаганда, қуйидаги ҳужжатлар тақдим қилинади:

• давлат ҳокимияти тегишли органлари, жумладан, Ўзбекистон давлат ва хўжалик бошқаруви органлари (www.gov.uz) ва банкларининг расмий хати ҳамда Хитой томонидан таклиф қилувчининг одатий таклифномаси;

ёки

• Ўзбекистон Савдо-саноат палатасининг (ССП) кафолат хати, ССПга аъзолик тўғрисидаги гувоҳнома, компания ёки якка тартибдаги тадбиркорнинг лицензияси, аризачининг иш жойидан маълумотнома таклиф қилаётган Хитой компаниясининг лицензияси илова қилинган одатий таклифнома.

Хитойнинг Тошкент шаҳридаги элчихонаси консуллик бўлимига қуйидаги телефон рақами орқали мурожаат қилиб, батафсил маълумот олиш мумкин: +998(71) 233-47-28.

Ишбилармон доира вакиллари – Хитой фуқароларига кўп марталик ишбилармонлик визасини расмийлаштириш учун таклиф қилаётган томон Ўзбекистон Ташқи ишлар вазирлигига қуйидаги ҳужжатларни тақдим қилиши шарт:

Асосий ҳужжатлар:

1. Таклиф қилаётган ташкилотнинг расмий бланкида чоп этилган ўрнатилган тартибдаги виза аризаси;
2. Evisa.mfa.uz сайтида тўлдирилган электрон виза анкетаси;
3. Таклиф қилинаётган кишининг шахсни тасдиқловши ҳужжати нусхаси (миллий паспорт ёки унинг ўрнини босувчи, хорижга чиққан пайтда ишлатиладиган ҳужжат).

Қўшимча ҳужжатлар:

4. Таклиф қилинаётган шахснинг иш жойидан маълумотнома (давлат тили ёки рус тилига таржимаси билан).

Ўзбекистон Ташқи ишлар вазирлигининг Консуллик-ҳуқуқий департаментига +998(71) 236-27-07 ёки +998(71) 233-73-40 рақамлари орқали қўнғироқ қилиб, батафсил маълумот олиш мумкин.