Andijon viloyatining Qo‘rg‘ontepa tumanida joylashgan Qo‘shtepa tarixiy tepaligi aholi uylariga yaqin joylashgan va uning ba’zi qismlari aholi tomonidan g‘isht qilib sotilmoqda. Bu haqda “Sevimli” telekanalining “Zamon” axborot dasturida xabar berildi.
Qayd etilishicha, Andijon davlat muzeyida 2018-yilning 6-noyabrida o‘z ishini boshlagan Qo‘shtepa arxeologik ko‘rgazmasida 600 ga yaqin eksponat mavjud. Eksponatlarning barchasi Qorasuv shahri “Mustaqillikning 15 yilligi” mahallasidagi Qo‘shtepa-2 tarixiy tepaligidan topilgan.
Arxeolog Baxtiyor Abdullayev boshchiligidagi ishchi guruh tomonidan besh yildan buyon mazkur obyektda olib borilgan qazish ishlari natijasida u yerdan 10 mingga yaqin sopol parchasi, 100 taga yaqin tosh qurol, o‘nlab bronza va temir buyumlar topilgan. Topilmalarni o‘rganish tepalik 12 asrdan ortiq davr mobaynida o‘zida hayot izlarini saqlab kelayotganini ko‘rsatgan.
Obyektning yer ustida saqlanib qolgan qismi 42 sotix maydonni egallaydi. Arxeologning so‘zlariga ko‘ra, tepalikda 15 metrga yaqin madaniy qatlam mavjud.
Tepalikka yaqin joylashgan aholi esa o‘z uylarini qurish maqsadida tepalikdan tuproq qazib olib, undan g‘isht quymoqda. Mutaxassislar esa bu holat tarixiy obyektga zarar yetkazishidan xavotirga tushmoqda. Aholi ham o‘z o‘rnida tarixiy obyektda qazishma ishlarining olib borilishidan norozi bo‘lmoqda, bu ishlar ularning uylari buzilishiga olib kelishidan xavotir olmoqda.
Izoh (0)