Ijtimoiy tarmoqlarda Buxoro viloyati hokimligi axborot xizmati Shofirkon tumanida quturgan itlar qo‘ylarni bo‘g‘izlab ketayotgani to‘g‘risidagi xabarlarga oydinlik kiritish maqsadida olib borilgan o‘rganish yakunlari yuzasidan ma’lumot berdi.
Unga ko‘ra, viloyat veterinariya va chorvachilikni rivojlantirish boshqarmasi, IIB PPX va JTSB karantin bo‘linmasi, Shofirkon tuman veterinariya va chorvachilikni rivojlantirish bo‘limi, tuman DSENM, tuman obodonlashtirish bo‘limi mutasaddilaridan iborat ishchi guruhi tuzilib, holat batafsil o‘rganilgan.
Aniqlanishicha, joriy yilning 17—19-oktabr kunlari kechki paytda “G‘ulomte” mahallasida yashovchi fuqaro Ato Fattoyevning ikki bosh qo‘yini daydi itlar g‘ajib ketgan.
Fuqaroning qo‘lbola qo‘rasi u istiqomat qilayotgan uyidan taxminan 30 metrlar chamasi uzoqroqda joylashgan bo‘lib, unda 11 bosh mayda shoxli chorva moli saqlangan.
O‘rganish jarayonida veterinariya mutaxassislari fuqaro Ato Fattoyevning uch bosh yirik shoxli va 9 bosh mayda shoxli chorvasini hamda atrofdagi barcha xonadonlarda parvarishlanayotgan chorva mollarini ko‘rikdan o‘tkazdi. Hozirda mavjud qoramol va qo‘ylar sog‘lom va zarar yetmaganligi aniqlandi. Shundan so‘ng tuman obodonlashtirish boshqarmasining daydi itlarni yo‘qotish guruhi tadbir o‘tkazdi.
“Uch nafar mutaxassisimiz daydi itlarni yo‘q qilish bilan shug‘ullanadi. Maxsus tadbir joylardan tushadigan murojaatlar yoki yillik rejaga binoan doimiy olib boriladi. Masalan, yil boshidan shu kungacha xodimlarimiz tomonidan 1554 ta daydi it va mushuk aniqlanib, belgilangan tartibda yo‘q qilingani fikrimiz isboti. Aholi o‘rtasida keng tushuntirish ishlari olib borilmoqda. Daydi itlar yon-atrofda haliyam borligiga shubhamiz yo‘q. Bu borada tegishli choralarni ko‘ramiz”, — deydi tuman obodonlashtirish bo‘limi boshlig‘i H.Yakubov.
Ato Fattoyev qaramog‘idagi chorva mollarini sug‘urtalamaganligi va o‘zining loqaydligi sababli moddiy zarar qoplab berilmaydi.
Izoh (0)