Ижтимоий тармоқларда тарқалган хусусий тадбиркор Ш.Юсуповнинг Президентга йўллаган видеомурожаати юзасидан Бош прокуратура баёнот берди.
Қайд этилишича, Бош прокуратура томонидан ижтимоий тармоқларда фуқаро Ш.Юсупов ва унинг тарафдорлари томонидан эълон қилинган видеомурожаатлар ўрганилган.
Унга кўра, Ш.Юсупов онлайн-аукцион орқали 326 миллион сўмга мулк сотиб олганлиги, лекин ҳуқуқни муҳофаза қилувчи органлар ушбу мулкни ундан олиб қўйиш мақсадида асоссиз равишда унга нисбатан жиноят иши қўзғатиб, уни қамоққа олмоқчи эканлиги, Бош прокуратура бошқарма бошлиғи ваъда берган бўлса-да, жиноят иши бўйича тергов Андижон вилоят прокуратурасидан Наманган вилояти прокуратурасига ўтказилмаганлигини билдирган.
Аниқланишича, Ш.Юсупов раҳбарлигидаги «Ю.» МЧЖ аукционда иштирок этиб, Олтинкўл туманидаги ферма бино-иншоотларини 326 миллион сўмга сотиб олган.
Мазкур ферма бино-иншоотлари Ш.Юсуповга тилхат асосида топширилиб, аукционга қўйилмаган бино-иншоотлар, мол-мулклар ва чорва моллари тегишли тартибда олиб чиқиб кетилиши тушунтирилган.
Ш.Юсуповнинг мурожаатига асосан Мажбурий ижро бюроси Андижон вилоят бошқармаси томонидан хизмат текшируви ўтказилиб, МИБ ходимлари томонидан ҳужжатларга аукционда сотилган мулк ҳақида нотўғри маълумотлар киритилганлиги ҳолати юзасидан Андижон вилоят прокуратураси томонидан Жиноят кодексининг 205-моддаси 1-қисми билан жиноят иши қўзғатилган бўлиб, ҳозирда тергов ҳаракатлари олиб борилмоқда.
Тергов ҳаракатлари давомида ферма бино-иншоотлари Ш.Юсупов томонидан сотиб олинган бўлса-да, МИБ ходимлари томонидан огоҳлантирилган бўлишига қарамасдан, аукцион савдоларига қўйилмаган ва ғолиблик баённомасига киритилмаган 300 миллион сўмлик қурилиш маҳсулотларини сотиб юбориб, жуда кўп миқдордаги мулкларни ўзлаштириш йўли билан талон-торож қилган.
Шунга кўра, жорий йилнинг 22 октябрь куни Ш.Юсупов Жиноят кодексининг 167-моддаси 3-қисми «а» банди, 168-моддаси 4-қисми «а» банди ва бошқа моддаларида назарда тутилган жиноятларни содир этганликда гумонланувчи тариқасида жалб қилиниб, Жиноят процессул кодексининг 221-моддаси тартибида ушланган.
Бундан ташқари, гумонланувчи Ш.Юсупов муқаддам содир этган жиноятлари учун 2014 йилнинг 15 январида ЖИБ Наманган вилоят судининг ҳукмига асосан Жиноят кодексининг 168-моддаси 1-қисми, 210-моддаси 3-қисми «б» банди ва бошқа моддалари билан айбли деб топилиб, 11 йил муддатга озодликдан маҳрум қилинган.
Қайд этилган жиноят ишининг тергови Бош прокуратура томонидан назоратга олинган бўлиб, терговни ҳудудийлигига кўра Наманган вилоят прокуратурасига ўтказилишига зарурият аниқланмаган.
Изоҳ (0)