Prezident Shavkat Mirziyoyev raisligida 16-oktabr kuni chorvachilik va bog‘dorchilik tarmoqlarini rivojlantirish bo‘yicha ustuvor vazifalarga bag‘ishlab o‘tkazilgan yig‘ilishda sohada ilmiy yondashuvni kuchaytirish, malakali kadrlarni ko‘paytirishga ham alohida qaratilgan. Bu haqda Toshkent davlat agrar universiteti rektori Botirjon Sulaymonov “Axborot 24” informatsion dasturiga bergan intervyusida ma’lum qildi.
“Yig‘ilishda eksport sohasiga juda katta e’tibor berildi. Ilmsiz bog‘dorchilik sohasini, umuman, qishloq xo‘jaligini rivojlantirib bo‘lmasligi, mahsulotlarni eksportga olib chiqish uchun ham, albatta, ilmiy yondashuv kerakligi ta’kidlab o‘tildi”, — deydi rektor.
Prezident matbuot xizmatining qayd etishicha, “yig‘ilishda bog‘dorchilikka ixtisoslashgan har bir tumanda agrotexnik tadbirlarni to‘g‘ri amalga oshirish uchun o‘quv markazlarini ochish vazifasi qo‘yilgan”. Rektor Botirjon Sulaymonov bu borada shunday dedi:
“Haqiqatan ham bizda shu vaqtgacha bog‘dorchilik bo‘yicha yoki uzumchilik sohasi bo‘yicha mutaxassislar tayyorlangan emas. Shuning uchun ham sohadagi kadrlarni ko‘paytirish, meva-sabzavotchilikka ixtisoslashgan 55 ta tumanda olimlar faoliyat olib borishi, kadrlar tayyorlashi uchun filiallar ochish bo‘yicha topshiriqlar berildi”.“Qibray va Toshkent tumanlari o‘rganilganda, 30, 40, hatto 70 yillik uzumzorlar, bog‘lar borligi aniqlandi. Hosildorlikni oshirish uchun yangi texnologiyalarga asoslangan usullarni ko‘paytirish, hozirgi zamon talabidan kelib chiqib yetishtirish texnologiyalarini ishlab chiqish bo‘yicha juda katta vazifalar qo‘yildi”, — deya qo‘shimcha qildi Agrar universitet rektori.
Avvalroq O‘zbekiston qishloq xo‘jaligi vaziri Jamshid Xo‘jayev eski bog‘larni yangilash zarurligini ta’kidlagani haqida xabar berilgan edi.
Izoh (0)